3:1  Nü Peetrus un Jehanes jinjen toop nop nö dem Tempel too de Jebädts Stund, de näajende Stund.

2  Un un wesa löma Maun fon ziene Muta äarem Lief worrt jedräacht, un däm läden zee Dachdäachlich bie det Haikj bie dem Tempel waut doa Shmok heet, un früach Aulmoozen fon dee waut nen jinjen;

3  dee, aus hee Peetrus un Jehanes zach reed toom en dem Tempel nen gönn, früach Aulmoozen fon ent.

4  Un Peetrus zad ziene Üajgen op am, met Jehanes, un zäd, „Kikj nö ons.“

5  Un hee jeef ent ziene Acht, un docht hee wuad waut kjrian fon ent.

6  Dan zäd Peetrus, „Zelwa un Golt ha ekj nich, oba zoont aus ekj ha jäw ekj die: En dem Nömen fon Jeezus Kjristus fon Natsaret, stö op un gö.“

7  Un hee noom am bie de raichte Haunt un hoof am op, un fuats kjräjen ziene Feet un feeten Jelenkja Krauft.

8  Un hee sprunk op, stunt un jinkj, un jinkj en dem Tempel nen met ent. Hee jinkj, un hupst un löwd Got.

9  Un aul de Menschen zajgen am gönn un Got löwen.

10  Dan wisten zee daut daut dee wia waut doa zaut un Aulmoozen prachad bie det Shmoke Hiakj fon dem Tempel; un zee wiarren jefelt met Wunda un Staununk äwa waut am pesiat wia.

11  Nü aus de löma Maun waut doa jeheelt wia aun hilt met Peetrus un Jehanes, aul de Menschen randen toop nö ent op det Shafot waut Zolomön zient heet, un wiarren zeeja jestaundt.

12  Un aus Peetrus daut zach, be‘auntwuad hee de Menschen: „Mana, Iesra’eelieten, wuarom staun jie äwa dit? Ooda woo kjikj jie zoo iarrentslich nö ons, aus wan wie, derrch onze äjene Krauft ooda Jetlichkjeit disem Maun han mäakt gonn?

13  “Abraham, Iezak un Jakob äa Got, onze Födash äa Got, feharrlicht zienem Deena Jeezus, wäm jie han jeewen un felüajgen en Pielatus ziene toojäajent, aus hee staunthauft wia am gönn too löten.

14  “Oba jie felüajgen dem Heiljen un dem Jeraichten, un früajgen daut jünt un Merrda zul jejäwt woarren,

15  “un dem Läwes Ferrsht müak jie Doot, wäm Got haud opjerecht fon de Doodes, fon waut wie Seijen zenn.

16  “Un zien Nömen, derrch Gloowen en zienem Nömen, haft disem Maun stoakj jemäakt, wäm jie zeenn un kjann. Jö, de Gloowen waut derrch am kjemt haft am gauns jezunt jemäakt en aul jüne jäajenwuat.

17  “Doch nü, Breeda, ekj weet daut jie daut deeden en Onwisenshöft, zoo aus uk jüne Harrsha deeden.

18  “Oba de Dinja waut Got en dem Ferüt zäd derrch aul de Profeeten äa Mül, daut de Kjrist wuad lieden, haft hee zoo errlfelt.

19  “Doot Büsee doawäajens un woat bekjiat, daut jüne Zinden muchten ütjelasht woarren, zoo daut de opjefreshde Tieden muchten kömen fon dem Harrn ziene jäajenwuat,

20  “un daut hee much Jeezus [1]Kjristus shekjen, dee doa eeja too jünt jeprädicht wia,

21 “wäm de Himel mot opnämen bot de Traichjestalde Tieden fon aule Dinja, waut Got jerädt haft derrch det Mül fon aul ziene heilje Profeeten fon don aus de Welt aunfonk.

22  “Dan Moozes zäd woarhauftich too de Födash, ‘De HARR jün Got woat un Profeet öprechten zoo aus ekj zen fon jüne Breeda. Am zel jie hiarren en aule Dinja, wautema hee too jünt zaicht.

23  ‘Un daut zaul zenn daut jieda Zeel waut däm Profeet nich woat hiarren zaul gauns fenicht woarren fon mank de Menschen.‘ ^{5 Moo 18:15,18,19}

24  “Jö, un aul de Profeeten fon Zamjul un dee waut följden, zoo fäl aus jerädt han, han en dem Ferüt [2]fetalt fon dise Däujgel.

25  “Jie zenn de Zäns fon de Profeeten, un fon dem Bunt waut Got haft jemäakt met onze Födash, aus hee too Abraham zäd, ‚Un en dienem Zöt zelen aul de Famieljes öp de Iad jezäajent woarren.‘ ^{1 Mo. 22:18 26:4  28:14}

26  “Too jünt iasht, Got, aus hee haud zienem Deena Jeezus opjerecht, shekjt am jünt too zäajnen, un jieda eenem fon jünt fon jüne [3]Beezichkjeiten too dreijen.

[1] NU-un M-Taikst läzen Kjristus Jeezus dee doa ferrhäa fe jünt ütjezat wia.

[2] NU-un M-Taikst läzen bekaunt jejäwt.

[3] De Jriekashe Spräak haft twee Wiad waut woarren jebrukt fe daut waut nich goot es. Det Wuat hia es ponäros, waut zeeja shlaicht meent, zoo woat det aus beez äwazat.