13:1 Nü en de Kjoakj waut bie Antiejok wia doa wiarren wese Profeeten un Liarash: Barrnabus, Ziemon waut doa Naiger jenant es, Lüsiejus fon Sairienie, Mana’en dee doa opjebrocht wia met Herödes de Gowerrnieja, un Saulus.

2  Aus zee dem Harrn deenden un fausten, zäd de Heilja Jeist, „Deelt Barrnabus un Saulus too mie fe de Oabeit too waut ekj ent jeroopt ha.“

3  Dan, aus zee jefaust un jebädt hauden, läden zee Henj op ent un shekjten ent waich.

4  Un aus zee rüt jeshekjt wiarren bie dem Heiljen Jeist, jinjen zee rauf nö Selüsiejan, un fon doa zäajelden zee nö Sieprus.

5  Un aus zee aunkjeemen bie Salamis, prädichten zee Got zien Wuat en de Jüden äare Zienagogen. Zee hauden uk Jehanes aus äa Methalpa.

6  Nü aus zee wiarren derrch det Inzel jegönn nö Pafos fungen zee doa un wesa Zaubra, un faulsha Profeet, un Jüd wäms Nömen Barr-Jeezus wia,

7  dee doa met dem Rejiara, Serrgiejus Paulus wia, un festendja Maun. Dis Maun roopt fe Barrnabus un Saulus un fezocht Got zien Wuat too hiarren.

8  Oba Elimas de Zaubra, dan zoo es zien Nömen fedolmescht, stunt jäajen ent, un fezocht dem Rejiara fon dem Gloowen waich too dreijen.

9  Saulus dan, dee doa uk Paulus jenant woat, jefelt met dem Heiljen Jeist, kjikjt ierrentstlich nö am

10  un zäd, „Ö fol fon aule Lest un aulem Shwindlarie, dü Zän fon dem Diewel, dü Fient fon aule Jeraichtichkjeit, woasht dü niemöls ophiarren met dem Harrn ziene jlikje Wäaj fedreijen?

11  “Un nü, entshieden, dem Harrn ziene Haunt es op die, un dü woasht blint zenn, un woasht de Zon nich zeenn fe ne Tiet.” Un fuats fol un dunkla Näwel op am, un hee jinkj rom un zocht wäm am bie de Haunt too leiden.

12  Dan jleewd de Rejiara, aus hee zach waut wia jedönn worrden, un wia jestaundt äwa de Lia fon dem Harrn.

13  Nü aus Paulus un dee rom am zäajelden fon Pafos, kjeemen zee nö Perrga en Pamfiliejan; un Jehanes feleet fon ent un jinkj trigj nö Jerüzalem.

14   Öba aus zee feleeten fon Perrga, kjeemen zee nö Antiejok en Pisidieja, un jinjen en de Zienagogen nen aun dem Zabat Dach un zauten döl.

15  Un nö dem Läzen fon det Jezats un de Profeeten, de Fäastöna fon de Zienagog shekjten nö ent, un zäden, „Mana un Breeda, wan jie irrjent un Troostwuat fe de Menschen han, dan zaicht.“

16  Dan stunt Paulus op, un wonk met ziene Haunt un zäd, „Mana fon Iesra’eel, un jie waut Got ferrchten, horrcht:

17  “De Got fon dise Menschen Iesra’eel wäld onze Födash, un hoof de Menschen op aus zee aus Framde en det Launt Ajipt wönden, un met un opjehöwnen Oam brocht hee ent doa rüt.

18  “Nü fe ne Tiet fon rom fiatich Joa brocht hee too met äare Wäaj en de Wiltnis.

19  “Un aus hee haud zäwen Natsjoonen en det Launt fon Kana’ent fenicht, fedeeld hee äa Launt too ent derrch Losen.

20  “Nö daut jeef hee ent Rechta fe rom feeja hundat un feftich Joa, bot dem Profeet Zamjul.

21  “Un nohäa früajgen zee nö un Kjenich; un Got jeef ent Saulus, Kish zienem Zän, un Maun fon dem Staum fon Benjamien, fe fiatich Joa.

22  “Un aus hee am haud rauf jezat, hoof hee Dawied op fe ent aus Kjenich, too wäm hee uk Seichnis jeef un zäd, ‚Ekj ha Dawied jefungen Jesie zienem Zän, un Maun nö mienet äjenet Hoat nö, dee mienem Welen woat doonn.‘ ^{1 Zam 13:14}

23  “Fon disem Maun zien Zöt, nö de Feshpräakjunk nö, haft Got un Rada opjestalt fe Iesra’eel, Jeezus,[1]

24  “nö däm daut Jehanes iasht jeprädicht haud, ferr zien kömen, de Doop fon Büsee too aul de Menschen fon Iesra’eel.

25  “Un aus Jehanes zien Foat foadich haud, zäd hee, ‘Wäa denkj jie daut ekj zen? Ekj zen nich hee. Oba doa kjemt eena nö mie, de Shoo fon wäm ziene Feet ekj nich wiat zen loos too mäaken.

26  “Mana un Breeda, Zäns fon Abraham ziene Famielje, un dee waut mank jünt Got ferrchten, too jünt es det Wuat fon dise Radunk jeshekjt.

27  “Fe dee waut en Jerüzalem wönn, un de Rejiara, wiels zee am nich kjanden, nich möl de Stemen fon de Profeeten dee doa jieda Zabat jeläst woarren, han dee errfelt en am fedaumen.

28  “Un doch aus zee nich Uazäak fungen en am, am Doot too mäaken, felangden zee fon Pielatus daut hee zul too Dood jebroch woarren.

29  “Nü aus zee hauden aules errfelt waut jeshräwen wia äwa am, noomen zee am rauf fon dem Boom un läden am en un Grauf.

30  “Oba Got hoof am op fon de Doodes.

31  “Hee wia jezeenn fe fäle Däujgel fon dee waut nop kjeemen fon Galiläja nö Jerüzalem, dee doa Seijen zenn too de Menschen.

32  “Un wie malden de goode Tieding aun too jünt, de Fespräakjunk waut too onze Födash jemäakt wia.

33  “Got haft dit errfelt too ons, äare Kjinja, en daut hee haft Jeezus opjerecht. Zoo aus daut jeshräwen es en det tweede Psalm:

‘Dü best mien Zän, fondäujgel ha ekj die

                jefödat.‘ ^{Ps 2:7}

34  “Un wäajen daut, daut hee am oprecht fon de Doodes, niemöls meeja trigj too gönn nö de Fejenklichkjeit, haft hee zoo jezaicht:

 

‚Ekj woa jünt de zechre Errboarrmungen

                fon Dawied jäwen.‘ ^{Jez. 55:3}

 

35 “Doawäajens zaicht hee en un aundren Psalm:

 

‘Dü woasht dienem Heiljen nich löten

                Fedoawnis zeenn.‘ ^{Ps 16:10}

 

36  “Dan Dawied, aus hee zien äjenet Jeneratsjoon haud jedeent derrch Got zienem Welen, shleep en, wia begröft met ziene Födash, un zach Fedoawnis;

37  “oba dee wäm Got oprecht zach nich Fedoawnis.

38  “Doawäajens löt jünt daut weeten jelöten woarren, Mana un Breeda, daut derrch dis Maun es jeprädicht too jünt de Fejäwunk fon Zinden;

39  “un derrch am jieda’eena waut jleewt es jeraichtfoadicht fon aule Dinja fon waut jie nich kunn jeraichtfoadiht woarren derrch Moozes zien Jezats.

40  “Paust op, doawäajens, doamet daut waut es jerädt worrden en de Profeeten met eenmöl op jünt kjemt:

 

41      “Zeetemöl, jie Shpeta,

                staundt un fekömt!

          Dan ekj shauf ne Oabeit en jüne Däujgel,

          Un Woakj waut jie äwa kjeen waich

                woarren jleewen,

          Wan wäa jünt daut doch noch

                aunmaldt.‘“  ^{Ha 1:5}

 

42  Un aus de Jüden üt de Zienagog rüt jinjen,[2] prachaden de Heiden daut dise Wiad muchten jeprädicht woarren too ent dem näaksten Zabat.

43  Nü aus de Fezaumlunk op jebräaken wia, fäle fon de Jüden un Frome Proselieten foljden Paulus un Barrnabus, dee, aus zee met ent räden, beräden ent aunhoolent too bliewen en Got ziene Jnöd.

44  Aun dem näaksten Zabat kjeem meis de gaunse Staut toop Got zien Wuat too hiarren.

45  Öba aus de Jüden de Shoarren zajgen, wiarren zee jefelt met aufgonst; un festreeden un lastaden, un räden jäajen de Dinja waut Paulus jezaicht haud.

46  Dan worrden Paulus un Barrnabus driest un zäden, „Daut wia needich daut Got zien Wuat zul iasht too jünt jerädt woarren; öba wiels jie daut waich shüwen, un rechten jünt det eewje Läwen nich wiat too zenn, zeetemöl, wie dreijen nö de Heiden.

47  “Dan zoo haft de Harr ons befölen:

 

‘Ekj ha jünt jezat aus un Licht too de

                Heiden,

          Daut jie zulen fe de Radunk zenn too de

                Enja fon de Welt.‘“ ^{Jez. 49:6}

 

48  Nü aus de Heiden dit hiaden, wiarren zee froo un feharrlichten dem Harrn zien Wuat. Un zoo fäl aus wiarren too det eewjet Läwen ütjestalt jleewden.

49  Un dem Harrn zien wuat worrt feshpreedt derrch de gaunse Jäajent.

50  Öba de Jüden riaden de Frome un de Fäanämende Frülied un de Hauptmana fon de Staut op, un brochten Fefoljunk jäajen Paulus un Barrnabus, un shmeeten ent üt äare Jäajent rüt.

51  Öba zee shedaden det Stof fon äare Feet jäajen ent, un kjeemen nö Ieköniejum.

52  Un de Jinja wiarren jefelt met Freid un met dem Heiljen Jeist.

[1] M-Taikst last fe Iesra’eel äare Zeelichkjeit.

[2] Ooda Aus zee üt de Zienagog fon de Jüden; NU Taikst last Un aus zee rüt jinjen prachadden zee.