5:1  Doawäajens wiels wie jeraichtfoadicht wiarren derrch Gloowen, ha wie Fräd met Got derrch onzem Harrn Jeezus Kjristus:

2  Derrch wäm wie uk toogank han derrch Gloowen en dize Jnöd nen wua‘en wie stönn, un freijen ons en de Höpninj fon de Harrlichkjeit fon Got.

3  Un nich bloos zoo, öba wie freijen ons en Triebzaul uk: wiels wie weeten daut Triebzaul shauft Jedult;

4  Un Jedult, Errfoarunk; un Errfoarunk, Höpninj:

5  Un Höpninj mäakt nich tooshaund: wiels Got ziene Leew es ütjegöten en onze Hoaten derrch dem Heiljen Jeist dee ons jejäwt es.

6  Dan aus wie noch önen Krauft wiarren, too de raichte Tiet storrf Kjristus fe de Onjetelje.

7  Dan shlaicht wuad eena fe un jeraichten Mensch stoawen; doch daut mucht zoont jäwen daut fe un gooden Mensch wuaden wese zikj wäujgen too stoawen.

8  Oba Got beweis ziene Leew too ons, en daut, wiels wie noch Zinda wiarren, storrf Kjristus fe ons.

9  Fäl meeja dan, nü daut wie jeraichtfoadicht zen derrch zien Bloot woa wie jeradt woarren fon Oaja derrch am.

10  Dan wan wie wiarren traichtjestalt met Got derrch dem Doot fon zienem Zän aus wie noch Fiend wiarren, fäl meeja, nü daut wie zen toop jebrocht, woa wie jeradt woarren derrch zien Läwen.

11  Un nich bloos daut, öba wie freijen ons en Got derrch onzem Harrn Jeezus Kjristus, derrch wäm wie nü han de Traichtstalunk jekjräajen.

12  Doawäajens, kraikt zoo aus derrch een Mensch Zind en de Welt nen kjeem, un de Doot derrch Zind, un zoo fespreed de Doot too aule Menschen, wiels aule han jezindicht.

13  Dan bot det Jezats wia Zind en de Welt, öba Zind woat nich toojeräakjent wua kjeen Jezats es.

14  Doch, Zind rejiad fon Adam bot Moozes, zoogoa äwa dee waut nich jezindicht hauden nö de Äjenlichkjeit nö fon Adam ziene äwaträdunk, dee doa un Bilt wia fon däm waut too kömen wia.

15  Öba de jnödens Göw es nich zoo aus de Äwaträdunk. Dan wan derrch Mensch ziene eene Äwaträdunk fäle storrwen, fäl meeja derrch de Jnöd fon Got un de Göw derrch de Jnöd fon dem een Mensch, Jeezus Kjristus, rand äwa too fäle.

16  Un de Göw es nich zoo aus daut waut derrch däm eenem kjeem waut doa zindicht. Dan det Jerecht waut kjeem fon eene Äwaträdunk brocht de Fedaumnis, öba de frieje Göw waut kjeem fon fäle Äawaträdungen brocht de Nöfolj fon de Raichtfoadjunk.

17  Dan wan bie eenem Mensch ziene Äwaträdunk de Doot rejiad derrch dem eenem, fäl meeja dee waut doa dem äwaflus fon Jnöd kjrian un fon de Göw fon Jeraichtichkjeit woarren rejiarren en det Läwen derrch dem eenem, Jeezus Kjristus.

18  Doawäajens, zoo aus det Jerecht kjeem too aule Menschen derrch een Mensch ziene Äwaträdunk, met de Ütkunft fon Fedaumnis, kraikt zoo derrch eenem Mensch ziene Jeraichte Dot kjeem de Jnödensgöw too aule Menschen, met de Ütkunft fon de Raichtfoadjunk fon det Läwen.

19  Dan zoo aus derrch eenem Mensch ziene Onjehoorrzomkjeit fäle wiarren Zinda jemäakt, zoo uk derrch eenem Mensch ziene Jehoorrzomkjeit woarren fäle Jeraicht jemäakt woarren.

20  Öba det Jezats kjeem nen daut de Äwaträdungen muchten äwarann. Öba wua Zind äwarand, doa rand Jnöd noch dola äwa,

21  daut zoo aus Zind haft rejiat en dem Doot, kraikt zoo mucht Jnöd rejiarren derrch Jeraichtichkjeit too det eewjet Läwen derrch Jeezus Kjristus onzem Harrn.