11:1  Ö daut jie wuaden metdräujgent zenn met mie en miene Onbesheidenheit, un werrkjlich, doo jie met mie metdräujgen.

2  Dan ekj zen Aufjenstich fe jünt met un jetlichen Aufgonst. Dan ekj ha jünt fespräaken too eenem Maun, daut ekj jünt much äwajäwen aus ne reine Junkfrü too Kjristus.

3  Öba ekj ferrcht daut äwa irrjent un Waich, zoo aus de Shlang Eefa feleid derrch Lest, zoo jüne Zens muchten fe’ädlicht woarren fon de Eenzomkjeit[1] waut en Kjristus es.

4  Dan wan dee waut kjemt un aundrem Jeezus prädicht wäm wie nich jeprädicht han, ooda wan jie un aundrem Jeist aunnämen waut jie nich jekjräajen han, ooda un aundret Eefanjeeliejum waut jie nich aunjenömen han, mucht jie doa zoogoa met delengd gönn!

5  Dan ekj räakjen daut ekj äwaheipt nusht hinja de hechste Aposteln zen.

6  Wan ekj uk onbeliat zen en räden, doch zen ekj nich en Wisenshoft. Öba wie woarren folstendich öpenboat mank jünt[2] en aule Dinja.

7  Deed ekj zindjen en mie zelfst deemütjen daut ekj mucht opjehöwen woarren, wiels ekj prädicht Got zien Eefanjeeliejum too jünt önen kost?

8  Ekj bestoolt aundre Kjoakjen, un noom Loon fon ent om jünt too bedeenn.

9  Un aus ekj bie jünt wia, un en Noot, wia ekj ne Laust too kjeenem, dan waut mie fäld jeewen de Breeda fon Masedöniejan mie. Un en aules hilt ekj mie fon ne Laust zenn too jünt, un zoo woa ekj mie zelfst hoolen.

10  Zoo aus de Woarheit fon Kjristus en mie es, kjeena woat mie hoolen fon dit jepuch en de Jäajenden fon Akäja.

11  Wuarom? Wiels ekj leew jünt nich? Got weet!

12  Öba waut ekj doo, daut woa ekj aunhoolen met doonn, daut ekj mucht de jeläajenheit auf shnieden fon dee waut jeläajenheit felangen toom aunjezeenn woarren kjraikt zoo aus wie zenn en aul de Dinja fon waut zee puchen.

13  Dan zoone zent faulshe Aposteln, Bedräujgende Oabeida, waut zikj zelfst fe’enderrn en Aposteln fon Kjristus nen.

14  Un kjeen wunda! Dan Zötön zelfst fe’endat zikj en un Enjel fon Licht nen.

15  Doawäajens es daut kjeen grootet Dinkj wan ziene Deena zikj zelfst fe’enderrn en Deena fon Jeraichtichkjeit nen, det Enj fon dee woat nö äare Woakjen nö zenn.

16  Ekj zaij wada, löt kjeenem denkjen fon mie aus un Noa. Wan nich aundash, weenstens nämt mie op aus un Noa, daut ekj mucht un bät puchen.

17  Waut ekj räd, räd ekj nich nö dem Harrn nö, öba zoo aus wan daut wia, noarish, en dize Toofetrüjunk fon puchen.

18  Wielt wie zeenn daut fäle puchen nö det Fleesh nö, woa ekj uk puchen.

19  Dan jie gönn welich met Noaren delenjd, wiels jie zelfst zenn weiz!

20  Dan jie fedräujgen daut wan wäa jünt en sklöwarie brinjt, wan wäa jünt opshlukt, wan wäa waut nemt fon jünt, wan irrjent eena zikj zelfst errhäwt, wan wäa jünt en det Jezecht shleit.

21  Too onze shaund, ekj zaij, wie zenn too shwak fe daut! Öba en wautema irrjent eena driest es, ekj räd noarish, ekj zen uk driest.

22  Zenn zee Heebräja? Ekj zen uk. Zenn zee Iesrä’eelieten?  Ekj zen uk. Zenn zee fon det Zöt fon Abraham? Ekj zen uk.

23  Zenn zee Kjristus ziene Deena? Ekj räd aus un Noa, ekj zen meeja: en Oabeiten met Äwaflus, en Striepen äwademöt, en Jefenknisen fäl fäakena, en Doodes fäaken.

24  Fon de Jüden kjräch ekj fief möl fiatich Striepen met eene weenja.

25  Dree möl wia ekj met Kjnepels feshläujgen; een möl jesteenicht; dree möl wia ekj en dem Shepbruk; ne Nacht un un Dach wia ekj en de Zee;

26  en Reizungen fäaken, en jefoa fon Wotash, en jefoa fon Reibash, en jefoa fon miene äjene Metbierja, en jejoa fon de Heiden, en jefoa en de Staut, en jefoa en de Wiltnis, en jefoa en de Zee, en jefoa fon faulshe Breeda;

27  en Femeedheit un Jeraka, en Shlöploozichkjeiten fäaken, en hunga un darrsht, en fausten fäaken, en dem kolden un näaktich,

28  un daut es bezied de aundre Dinja, daut waut Dachdäachlich op mie kjemt: miene deepe Zorrj fe aul de Kjoakjen.

29  Wäa es shwak, un ekj zen nich shwak? Wäa es toom faulen jebrocht, un ekj bren nich met Oaja?

30  Wan ekj mot puchen, ekj woa puchen met de Dinja waut too doonn han met miene Shwakheiten.

31  De Got un Föda fon onzem Harrn Jeezus Kjristus, dee doa jezäajent es fe’ema, weet daut ekj nich läj.

32  En Damaskus, de Gowerrnieja, unja Aretas de Kjenich, wäakt äwa de Staut fon Damaskus met ne Fastinj, un felangd toom mie emfangen;

33  öba ekj worrt rauf jelöten en un Korrf derrch un Fensta en de Waunt, un kjeem üt äare Henj rüt.

[1] NU-Taikst laicht too luta ooda rein.

[2] NU-Taikst lat üt zenn jewast.