13:1  Dit woat det drede möl zenn waut ekj nö jünt kömen doo. „Bie det Wuat fon twee ooda dree Seijen zaul jieda Wuat jejrindt woarren.“^{5 Mo 19:15}

2  Ekj ha jünt eeja jezaicht, un zaij en dem Ferüt aus wan ekj en jüne Jäajenwuat wia det tweede Möl, un nü wielt ekj waich zen shriew ekj[1] too dee waut eeja jezindicht han, un too aul de äwaje, daut wan ekj wada köm woa ekj jünt nich spoarren,

3  daut es wiels jie zäkjen nö Opwies daut Kjristus en mie rädt, dee nich shwak es too jünt, öba mechtich en jünt.

4  Dan wan hee jekjrietsicht wia en Shwakheit, doch läwt hee derrch de Krauft fon Got. Dan wie zenn uk shwak en am, öba wie woarren met am läwen derrch de Krauft fon Got jün Waich han.

5  Unjazäkjt jünt zelfst aus jie werrkjlich en dem Gloowen zenn. Proowt jünt zelfst. Weet jie nich zelfst daut Jeezus Kjristus en jünt es, daut es, büta jie zenn werrkjlich rüt jestat.

6  Öba ekj fetrü daut jie woarren weeten daut wie nich rüt jestat zenn.

7  Nü ekj[2] bäd too Got daut jie kjeen shlaichtet doonn, nich daut wie zulen löten aus wan wie gootheeten, öba daut jie zulen doonn waut Iaboa es, daut zikj daut nich shient daut wie rauf jezat zenn.

8  Dan wie kjenn nusht doonn jäajen de Woarheit, öba fe de Woarheit.

9  Dan wie zenn froo wan wie shwak zenn un jie stoakj. Un dit bäd wie uk, daut jie muchten jefoadicht woarren.

10  Doawäajens shriew ekj dize Dinja wielt ekj nich doa zen, zust wan ekj doa zen mucht ekj shoap zenn nö de Machtraicht nö waut de Harr mie jejäwt haft fe jüne Opbüjunk un nich fe Fenichtunk.

11  Shlieslich, Breeda, audee. Woat jefoadicht. Ziet mootich, ziet fon eenem Zen, läwt en Fräd; un de Got fon Leew un Fräd woat met jünt zenn.

12  Jreest eena dem audrem met un heiljen Kus.

13  Aul de heilje jreesen jünt.

14  Mucht de Jnöd fon dem Harrn Jeezus Kjristus, un de Leew fon Got, un de Jemeenshoft fon dem Heiljen Jeist met jünt aula zenn. Amen. (De tweeda Breef nö de Korinta wia jeshräwen fon Filipie, ne Staut fon Masedönieja, bie Tietus un Lukas.)

[1] NU-Taikst lat shriew ekj üt.

[2] NU-Taikst last wie.