3:1  Doawäajens, aus wie daut nich lenja üthoolen kunn, docht wie daut wia goot toom auleen jelöten woarren en Ateen.

2  un shekjten Timotäjus, onzem Brooda un Got zienem Deena, un jünem Metoabeida en det Eefanjeeliejum fon Kjristus, toom jünt Staunthauft mäaken un Treesten om jünem Gloowen.

3  daut kjeena fon jünt zul fesheckjat zenn bie dize Triebzauls; dan jie zelfst weeten daut wie zenn hanjestalt too dit.

4  Dan uk, wie fetalden jünt ferrhäa aus wie met jünt wiarren daut wie zulen Triebzaul lieden, kraikt zoo aus daut uk worrt, un jie weeten.

5  Dan fe dize Uazäak, aus wie daut nich lenja fedräujgen kunn, shekjt ekj om jünem Gloowen too weeten, doament de Fezäkja op irrjent un Waich jünt haud fezocht, un onze Oabeit mucht fenusht zenn.

6  Öba nü daut Timotäjus es nö ons jekömen fon jünt, un brocht ons goode Nörecht fon jünem Gloowen un jüne Leew, un daut jie goode Jedenkja han fon ons, un felangen ons too zeenn, zoo aus wie toom jünt zeenn,

7  doawäajens, Breeda, en aul onze Triebzauls un Bedrekjungen wia wie jetreest äwa jünt derrch jünem Gloowen.

8  Dan nü läw wie, wan wie faust stönen en dem Harrn.

9  Dan waut fon Dank kje wie aufjäwen too Got fe jünt, fe aul de Freid met woone wie ons freijen om jünts haulwen ferr onzem Got,

10 un wie bäden äwademöt Nacht un Dach daut wie muchten jün Jezecht zeenn un daut ütfoadjen aun waut jünem Gloowen daut fält?

11  Nü mucht ons Got un Föda zelfst, un ons Harr Jeezus Kjristus, ons Waich nö jünt lenkjen.

12  Un mucht de Harr jünt mäaken too nämen un äwarann en Leew eena too dem aundrem un too aulem, kraikt zoo aus wie too jünt,

13  zoo daut hee mucht jüne Hoaten jrinden, fälaloos en Heiljunk ferr onzem Got un Föda wan ons Harr Jeezus Kjristus woat kömen met aul de Heilje.