1:1  Paulus, Silwanus un Timotäjus, Too de Kjoakj fon de Tesalonichan en Got onszem Föda un dem Harrn Jeezus Kjristus:

2 Jnöd too jünt un Fräd fon Got onzem Föda un dem Harrn Jeezus Kjristus.

3  Wie zenn shuldich Got ema too danken fe Jünt, Breeda, zoo aus daut jesiemlich es, wiels jün Gloowen waust äwaflisent, un de Leew fon jieda eenem fon jünt rant äwa too eenaunda,

4 zoo daut wie zelfst puchen fon jünt mank Got ziene Kjoakjen fe jüne Jedult un Gloowen en aul jüne Fefoljungen un Triebzauls waut jie lieden,

5  waut öpenboare Opwies es fon det jeraichtet Jerecht fon Got, daut jie muchten wiat jetalt woarren fon Got zienem Rikjdom, fe woont jie lieden;

6  wiels daut es un Jeraichtet Dinkj met Got dee met Triebzaul trigj too tölen waut jünt trubeln,

7 un toom jünt, dee jetrubelt zenn Rü jäwen met ons wan de Harr Jeezus jeöpenboat woat zenn fon dem Himel met ziene mechtje Enjeln,

8 en flaumendet Fia racheewen äwa dee waut nich Got kjann, un op dee waut nich det Eewanjeeliejum fon onzem Harrn Jeezus Kjristus jehoorrzom zenn.

9 Dize woarren jeströwt woarren met eewjet Fenichten fon de jäajenwuat fon dem Harrn un fon de Harrlichkjeit fon ziene Krauft,

10  wan hee kjemt, en däm Dach, toom jeharrlicht woarren en aul ziene Heilje un toom je’acht woarren  mank aul dee waut jleewen,[1] wiels ons Seichnis wia jejleewt mank jünt.

11  Doawäajens bäd wie ema fe jünt daut ons Got jünt woat wiat talen fon dize Roopunk, un aul det goodet Jefaulen fon zien goodet errfelen un det Woakj fon Gloowen met Krauft,

12  daut de Nömen fon onzem Harrn Jeezus Kjristus mucht feharrlicht woarren en jünt, un jie en am, nö de Jnöd fon onzem Got nö un dem Harrn Jeezus Kjristus.

[1] NU-un M. Taikst zaijen han jejleewt.