2:1  Nü Breeda, om det kömen fon onzem Harrn Jeezus Kjristus un onze Fezaumlunk nö am, fräujg wie jünt,

2  toom nich boolt opjeshekjat woarren ooda jetrubelt derrch un Jeist ooda bie Wuat ooda bie Breef, aus wan dee fon ons wia, aus wan de Dach fon Kjristus[1] öl jekömen es.

3  Löt kjeenem jünt feleiden derrch irrjent un Waich; dan dee Dach woat nich kömen büta det felöten iasht kjemt un de Maun fon Zind[2] jeöpenboat woat, de Zan fon Fedoafnis,

4  dee doa jäajen aules steit un häwt zikj zelfst äwa aules waut Got jenant es ooda waut aunjebädt woat, zoo daut hee aus Got en dem Tempel zet un bewiest zikj zelfst daut hee Got es.

5  Denkt jünt daut nich daut aus ekj noch met jünt wia daut ekj jünt dize Dinja zäd?

6  Un nü weet jie waut trigj helt, daut hee mucht jeopenboat woarren en ziene äjene Tiet.

7  Dan det Jeheemnis fon Jezatsloozichkjeit shauft nü öl; bloos dee waut nü trigj helt woat zoo doonn bot hee üt dem Stich jenömen woat woarren.

8  Un dan woat de Jezatslooza je’öpenboat woarren, wäm de Harr woat fedoawen met dem Ödem fon zien Mül un fenichten met det jeshien fon zien kömen.

9  Det kömen fon dem Jezatsloozen es nö de Wirrkjunk fon dem Zötön, met aulet Krauft, Takjens un läjende Wundash,

10  un met aul det onjeraichtet Shwindlarie mank dee waut fekömen, wiels zee noomen nich de Leew fon de Woarheit op, daut zee muchten jeradt woarren.

11  Un fe dize Uazäak woat Got ent stoakje Aunshmäarunk shekjen, daut zee zulen un Läj jleewen,

12  daut dee aula muchten fedaumt woarren waut nich de Woarheit jleewden öba jefaulen hauden en Onjeraichtichkjeiten.

13  Öba wie zenn shuldich ema dank too jäwen too Got fe jünt, jeleewde Breeda bie dem Harrn, wiels Got fon dem Aunfank wäld jünt fe de Radunk derrch de Heiljunk derrch dem Jeist un Gloowen en de Woarheit,

14  too waut hee jünt jeroopt haft derrch mien Eewanjeeliejum, toom de Harrlichkjeit fon onzem Harrn Jeezus Kjristus too kjrian.

15  Doawäajens, Breeda, stöt faust un hoolt de Mooden waut jie jeliat wiarren, aus bie Wuat ooda onzem Breef.

16  Nü mucht de Harr Jeezus Kjristus zelfst, un ons Got un Föda, dee ons jeleewt haft un ons eewje Treestunk un goode Höpninj derrch Jnöd jejäwt haft,

17  jüne Hoaten treesten un jünt staunthauft mäaken en jieda goodet Wuat un Woakj.

[1] NU-Taikst last dem Harrn.

[2] NU-Taikst last Jezatsloozichkjeit.