3:1 Shlieslich, Breeda, bädt fe ons, daut det Wuat fon dem Harrn mucht bözich rann un feharrlicht woarren, kraikt zoo aus daut es en jünt,

2 un daut wie muchten jeradt woarren fon onfeninftieje un beeze Mentshen; dan nich aule han Gloowen.

3 Öba de Harr es trü, un dee woat jünt jrinden un bewoarren fon dem Beezen.

4 Un wie han Toofetrüjen en dem Harrn wäajen jünt, beides daut jie doonn un woarren de Dinja doonn waut ekj jünt beföl.

5 Nü mucht de Harr jüne Hoaten en de Leew fon Got nen lenken un en de Jedult fon Kjristus nen.

6  Öba wie befölen jünt, Breeda, en dem Nömen fon dem Harrn Jeezus Kjristus, daut jie trigj traikjen fon jieda Brooda waut doa onorrdentlich waundelt un nich nö de Mooden nö waut hee[1] fon ons kjräch.

7  Dan jie zelfst weeten woo jie ons foljen zulen, dan wie wiarren nich onorrdentlich mank jünt;

8 un wie eeten uk nich irrjentwäm zien Broot en dem zonst, öba shauften met oabeit un raka Nacht un Dach, daut wie nich muchten ne Laust zenn too irrjent fon jünt,

9 nich wiels wie nich de Machtraicht han, öba toom ons zelfst un Bilt mäaken fon woo jie ons zulen foljen.

10  Dan zoogoa aus wie noch met jünt wiarren, beföl wie jünt dit: Daut wan irrjent eena nich wul shaufen, zul hee uk nich äten.

11  Dan wie hiarren daut doa wese waut mank jünt waundeln en un onorrdentlichen waich, un shaufen äwaheipt nich, öba zenn drok en Nöfetal.

12  Nü dee waut zoone zenn befäl wie un femön wie derrch dem Harrn Jeezus Kjristus daut zee zulen emstelen shaufen un äa äjenet Broot äten.

13  Öba zoo aus fe jünt, Breeda, woat nich meed en goots doonn.

14  Un wan irrjent eena ons Wuat en dizen Breef nich horrcht, betäkjent däm Mentsh un hat nich jemeenshoft met am daut hee zikj mucht shämen.

15  Doch, talt am nich aus un Fient, öba femönt am aus un Brooda.

16  Nü mucht de Harr fon Fräd zelfst jünt ema Fräd jäwen en jieda waich. De Harr zie met jünt aula.

17  De Grus fon Paulus met miene äjene Haunt, waut un täkjen es en jieda Breef; zoo shriew ekj.

18  De Jnöd fon onzem Harrn Jeezus Kjristus zie met jünt aula. Amen. (De tweeda Breef too de Tesaloonichan wia jeshräwen fon Ateen.)

[1] NU-un M. Taikst läzen dee.