1:1  Daut waut fon dem Aunfank wia, waut wie han jehiat, waut wie han jezeenn met onze Üajgen, waut wie nö jekjikjt han, un onze Henj han jehauntiat, wäajen det Wuat fon det Läwen,

2  det Läwen wia öpenboat, un wie han jezeenn, un dräujgen Siechnis, un beheipten too jünt daut eewjet Läwen waut met dem Föda wia un worrt jeöpenboat too ons,

3  daut waut wie jezeenn han un jehiat han beheipt wie too jünt, daut jie muchten Jemeenshoft han met ons; un werrkjlich onze Jemeenshoft es met dem Föda un met zienem Zän Jeezus Kjristus.

4  Un dize Dinja shriew wie nö jünt daut jüne[1] Freid mucht fol zenn.

5  Dit es de Berecht waut wie han fon am jehiat un beheipten too jünt, daut Got es Licht un en am es kjeene Diestanis äwaheipt nich.

6  Wan wie zaijen wie han Jemeenshoft met am, un waundeln en Diestanish, läj wie un eewen nich de Woarheit.

7  Öba wan wie en det Licht waundeln zoo aus hee en det Licht es, ha wie jemeenshoft eena met dem aundren, un det Bloot fon Jeezus Kjristus zienem Zän reinicht ons fon aule Zind.

8  Wan wie zaijen daut wie nich Zind han, feleid wie ons zelfst, un de Woarheit es nich en ons.

9  Wan wie onze Zinden bekjann, es hee trü un jeraicht ons onze Zinden too fejäwen un ons too reinjen fon aule Onjeraichtichkjeit.

10  Wan wie zaijen daut wie han nich jezindicht, mäak wie am un Läajena un zien Wuat es nich en ons.

[1] NU-un M-Taikst läzen onze.