4:1    Dan worrt Jeezus en de Wiltnis jeleidt fon dem Jeist toom fezocht woarren fon dem Diewel.

2  Un aus hee haud fe fiatich Daujgel jefaust, wia hee nöhäa hungrich.

3  Aus de Fezäkja nö am kjeem, zäd hee, “Wan dü Got zienem Zän best, dan befäl dize Steena Broot too woarren.”

4  Öba hee zäd, “Daut steit jeshräwen, ‘Mensch zaul nich fon Broot auleen läwen, öba fon jieda Wuat waut üt Got zien Mül kjemt.´“ ^{5 Moo 8:3}

5  Dan noom de Diewel am en de Heilje Staut nen, un zad am op dem Tempelspets nop,

6  un zäd too am, „Wan dü Got zien Zän best, dan shmiet die zelfst rauf. Dan daut steit jeshräwen,

              ´Hee woat ziene Enjeln Opläujg jäwen

              äwa die´,

un

              ‚Zee woarren die en äare Henj bewoarren,

              Zoo daut dü dienem Foot nich jäajen

              un Steen steeten woasht.´“ ^{Ps 91:11,12}

7  Jeezus zäd too am, „Daut steit wada jeshräwen, ´Dü zaust Got nich fezäkjen.´“ ^{5 Mo. 6:16}

8  Dan neem de Diewel am wada op un zeeja hüajgen Boach nop, un wees am aul de Rikjs fon de Welt un aul äare Harrlichkjeit.

9  Un hee zäd too am, „Aul dize Dinja woa ekj die jäwen wan dü woasht han faulen un mie aunbäden.“

10  Dan zäd Jeezus too am, „Waich met die, Zötön! Dan daut steit jeshräwen, ´Dü zaust Got dienem Harrn aunbäden, un am auleen zaust dü deenn!“ ^{5 Moo 6:13}

11  Dan feleet de Diewel am, un zeetemöl, Engeln kjeemen un deenden am.

12    Nü aus Jeezus jehiat haud daut Jehanes en det Jefenknis wie jestopt worrden, feleet hee fe Galiläja.

13  Un hee feleet Natsaret un kjeem un wönd en Kaperna‘um, waut bie de Zee es en de jäajenden fon Zebjulon un Naftalie,

14  daut daut mucht errfelt woarren waut derrch Jezaija dem Profeet jezaicht wia,

15         „Det Launt fon Zebjulon un det Launt

                     fon Naftalie,

              Bie dem Waich fon de Zee,

                     aun jant zied dem Jorrdan,

              Galiläja fon de Heiden:

16         De Menschen waut en dem

                 diesterrn zauten han un grootet

              Licht jezeenn,

               Un op dee waut en de Jäajent fon

                     det Diestre fon dem Doot zauten

               Es un Licht opjegönn.“  ^{Jez 9:1,2}

17    Fon dee Tiet fonk Jeezus aun too prädjen un too zaijen, „Doot Büsee, dan det Himelrikj es dicht bie.“

18  Un Jeezus jinkj bie de Galiläjashe Zee un zach twee Breeda, Ziemon, dee Peetrus jenant wia, un Andräjus zienem Brooda, un zee shmeeten un Nat en de Zee, dan zee wiarren Fesha.

19  Dan zäd hee too ent, „Folcht mie, un ekj woa jünt Fesha fon Menschen mäaken.“

20  Un fuats opdestäd feleeten zee äare Nats un foljden am.

21  Un hee jinkj wieda fon doa, un zach twee aundre Breeda, Jakoobus, de Zän fon Zebedie, un Jehanes zienem Brooda, en det Boot met Zebedie äa Föda, un zee neiden äare Nats. Un hee roopt ent,

22  un fuats feleeten zee äa Boot un äa Föda, un jinjen am hinjaraun.

23  Un Jeezus jinkj rom aulet Galiläja un liad en äare Zienagogen[1] un prädijgd det Eefanjeeliejum fon det Kjenichrikj, un heeld aule zorrten Krankheiten un aule zorrten Shwakheiten mank de Menschen.

24  Dan jinkj ziene Beriemtheit derrch det gaunse Surieja, un zee brochten aul de bediewelde, dee waut Aunstoot hauden, un Jelämde un hee heeld ent.

25  Groote Shoarren jinjen am hinjaraun fon Galiläja, un fon de Tianstäda, Jeruzalem, Jüdäja un fon äwa dem Jorrdan.

[1] Judenshoolen.