Kapitel 8 MATÄJUS
8:1 Aus hee wia fon dem Boach rauf jekömen, foljden groote Shoarren am.
2 Un zeetemöl, un Leprakranka kjeem un bäd am aun un zäd, „Harr, wan dü welich best, dü kaust mie rein mäakjen.“
3 Dan straikt Jeezus ziene Haunt rüt un shiad am aun un zäd, „Ekj zen welich, zie rein!“ Un fuats wia ziene Leprakrankheit jereinicht.
4 Un Jeezus zäd too am, “Zee daut dü kjeenem zaichst, öba gö dienem Waich un wiez die zelfst nö un Priesta, un opfa de Göw waut Moozes bestalt haft aus un Seichnis too ent.”
5 Nü, aus Jeezus en Kaperna‘um wia nen jekömen, kjeem un Zuldötenleida[1] nö am un prachad am,
6 un zäd, „Harr, mien Deena licht tüs jelämt, un es shraikjlich jetüaleidt.“
7 Un Jeezus zäd too am, “Ekj woa am kömen heelen.”
8 De Zuldötenleida auntwuad un zäd, “Harr, ekj zen daut nich wiat daut dü zust unja mien Dak kömen. Öba zaij bloos det Wuat, un mien Deena woat jeheelt zenn.“
9 Dan ekj zen uk un Maun unja Machtraicht un ha Zuldöten unja mie. Un ekj zaij too disem, ‚Gö,‘ un dee jeit; un too un audrem, ‚Kom,‘ un hee kjemt; un too mien Sklöw, ‚Doo dit,‘ un hee deit daut.“
10 Aus Jeezus dit hiad, staund hee un zäd too dee waut am foljden, „Werrkjlich, zaij ekj too jünt, ekj ha nich zoon grooten Gloowen jefungen, nich möl en Iesra’eel!”
11 Un ekj zaij too jünt daut fäle woarren kömen fon dem Oosten un wasten, un zikj döl zaten met Abraham, un Iezak un Jakob en det Himelrikj.
12 Öba de Zäns fon det Kjenichrikj woarren rüt jeshmäten woarren en de bütashte Diestanis nen. Doa woat hielen un Tänen gnorrshen zenn.
13 Dan zäd Jeezus too dem Zuldötenleida, “Gö dienem Waich; un zoo aus dü jejleewt hast, zoo löt daut too die Jedönn woarren.” Un zien Deena wia jeheelt fon dee zelfstje Stund.
14 Nü aus Jeezus wia en Peetrus zien Hüs nen jekömen, zach hee ziene Frü äare Muta doa ligjen, krank met un Feeba.
15 Un hee shiad äare Haunt aun, un de Feeba feleet arr. Un zee stunt op un deend ent.
16 Aus Öwent jekömen wia, brochten zee am fäle waut bediewelt wiarren. Un hee shmeet de Jeista rüt met un Wuat, un heeld aul dee waut krank wiarren,
17 daut daut mucht errfelt woarren waut jerädt wia derrch Jezaija dem Profeet aus hee zäd, „Hee, bie zikj zelfst neem onze Shwakheiten un drüach onze Krankheiten.“ Jez 53:4
18 Un aus Jeezus de groote Shoarren rom am zach, jeef hee befäl toom nö de aundre zied felöten.
19 Dan kjeem un wesa Shreftjeliada un zäd, “Liara, ekj woa die foljen wua’ema dü han Jeist.“
20 Un Jeezus zäd too am, „Fas han Laicha un de Fäajel fon de Loft han Nasta, öba de Menschenzrän haft noanich zienem Kop han too laijen.“
21 Dan zäd noch eena fon ziene Jinja too am, „Harr, löt mie iasht gönn mienem Föda begröwen.“
22 Öba Jeezus zäd too am, „Folj mie, un löt de Doodje äare äjene Doodes begröwen.“
23 Nü, aus hee en det Boot nen Stäch, foljden ziene Jinja am.
24 Un haustich wia doa un groota Storrm op de Zee, zoo daut de Wötawalen äwa det Boot jinjen. Öba hee shleep.
25 Dan kjeemen ziene Jinja nö am un wüaken am op un zäden, “Harr, rad ons. Wie kömen om!“
26 Un hee zäd too ent, „Wuarom ze jie angst, Ö jie kjlien Gloowshe?“ Dan stunt hee op un femönd de Wind un de Zee, un daut worrt gauns stel.
27 Dan staunden de Mana un zäden, „Wäa kaun dit zenn, daut zoogoa de Wind un de Zee am jehia jäwen?“
28 Aus hee nö de aundre zied jekjömen wia, nö de Jäajent fon de Gerrgezienen, trofen am doa twee bediewelde Mana, waut üt de Jräwa kjeemen, äwa de möt rietent, zoo daut kjeena kun doa febie gönn.
29 Un haustich shräjen dee üt un zäden, „Waut ha wie met die too doonn, Jeezus, dü Goteszän? Best dü jekömen ons too tüaleiden ferr de Tiet?“
30 Nü un goodet Enj auf fon ent wia ne Häad fon fäle Shwien waut doa freeten.
- Dan prachaden de Diewels am un zäden, „Wan dü ons rüt shmitst, errlaub daut wie waich en de Häad Shwien nen gönn.“
- Un hee zäd too ent, „Göt.“ Un dan aus zee wiarren rüt jekömen, jinjen zee en de Häad Shwien nen. Un haustich rand de gaunse Häad Shwien jewaultzom fon ne steile Städ rauf en det Mäa nen, un fezoopen en det Wöta.
- Un dee waut dee feeden deeden flüajgen Waich; un zee jinjen en de Staut nen un fetalden aules waut pesiat wia, un uk waut de Bediewelde jeworrden wia.
- Un zeetemöl, de gaunse Staut kjeem Jeezus entjäajen. Un aus zee am zajgen, prachaden zee am äare Jäajent too felöten.
[1] Jriekjish, hekakontarkos, Leida fon 100 Zuldöten.