15:1  Dan kjeemen de Shreftjeliade un Foarizäja fon Jeruzalem nö Jeezus un zäden,

2  “Wuarom doonn diene Jinja de Kultuaren fon de Eltestash äwaträden? Dan zee waushen nich äare Henj eeja zee äten.“

3  Hee auntwuad un zäd too ent, „Wuarom äwaträd jie det Jeboot fon Got wäajen jüne Kultuaren?”

4  “Dan Got beföl un zäd, „Iat jünem Föda un jüne Muta‘; ^{2 Mo. 20:12} un, ‚Dee wäa Föda ooda Muta feflucht, löt däm Doot jemäakt woarren.’ ^{2 Mo. 21:17}

5  “Öba jie zaijen, ‘Wäa’ema zaicht too zienem Föda ooda Muta, „Wautema fon Jewenst dü muchst han jekjräajen fon mie es ne Göw fe Got’,

6  ‘dan brukt dee nich zienem Föda un Muta iaren.’ Zoo ha jie det Jeboot fon Got too nusht jemäakt derrch jüne Kultua.

7  “Heichla! Sheen haft Jezaija jeprofetseit fon jünt aus hee zäd:

8            ‘Dise Menschen kömen mie nö’aun

                     met äa Mül,

              Un iarren mie met äare Lepen,

              Öba äa Hoat es wiet fon mie.

9            Un fejäfs bäden zee mie aun,

              Un liarren aus Liaren de Jebooten

                     fon Menschen.‘“

10  Aus hee de Shoa haud nö zikj zelfst jeroopt, zäd hee too ent, „Horrcht un festöt:

11  “Nich daut waut en det Mül nen jeit fe’onreinicht un Mensch; öba waut üt det Mül kjemt, dit fe’onreinicht un Mensch.“

12  Dan kjeemen ziene Jinja un zäden too am, „Weetst dü daut de Faurizäja beleidicht wiarren aus zee dize Zaij hiaden?“

13  Öba hee auntwuad un zäd, „Jieda Plaunt waut mien Himelsha Föda nich haft jeplaunt woat üt jeräten woarren.

14  “Lot dee toch. Zee zenn blinje Leida fon de Blinje.  Un wan de Blinje de Blinje leiden, woarren beid en dem Gröwen faulen.“

15  Dan auntwuad Peetrus un zäd too am, „Errkjläarr ons dize Zaij.“

16  Un Jeezus zäd, „Best dü uk noch önen Festentnis?

17  “Festeis dü noch nich daut wautema en det Mül nen jeit, jeit en dem Buk nen un jeit rüt?

18  “Öba de Dinja waut üt det Mül rüt gönn, kömen fon det Hoat, un dee fe’onreinjen un Mensch.

19  “Dan üt det Mül gönn beeze Jedanken, Morrts, Eehezinden, Hürariejen; Stälarie, faulshe Seichnisen, Lastrungen.

20  “Dit zenn de Dinja waut Mensch fe’onreinjen, öba toom äten met onjewoshne Henj fe’onreinicht Mensch nich.“

21  Dan jinkj Jeezus rüt fon doa un feleet nö de Jäajent fon Türos un Ziedön.

22  Un zeetemöl, ne Frü fon Kana’ent kjeem fon dee Jäajent un shräch üt nö am un zäd, „Errboarrm die äwa mie, Ö Harr, Zän fon Dawied! Miene Dochta es zeeja bediewelt.

23  Öba hee auntwuad arr nich un Wuat. Un ziene Jinja kjeemen un fezochten am un zäden, „Shekj arr waich, dan zee shricht ons hinjaraun.“

24  Öba hee auntwuad un zäd, „Ekj zen nich jeshekt büta nö de felorrne fon det Hüs fon Iesra’eel.“

25  Dan kjeem zee un bäd am aun un zäd, „Harr, halp mie!“

26  Öba hee auntwuad un zäd, „Daut es nich goot de Kjinja äa Broot too nämen, un daut nö de Hungkjes too shmieten.”

27  Un zee zäd, „Jö Harr, doch zoogoa de Hungkjes äten fon de Kjreemels waut fon dem Meista zienem Desh faulen.“

28  Dan auntwuad Jeezus un zäd too arr, „Ö Frü, groot es dien Gloowen! Löt daut too die zenn zoo aus dü felangst.“

29  Jeezus feleet fon doa, jinkj rom de galiläjashe Zee, un jinkj op un Boach nop un zaut zikj doa döl.

30  Dan kjeemen Shoarren nö am, un hauden met zikj Löme, Blinje, Doowe, Fekjräpelde un fäle aundre; un zee läden dee han bie Jeezus ziene Feet, un hee heeld ent,

31  zoo daut de Shoa staund aus zee de Stome zajgen räden, de Fekjräpelde worrden gauns, de Löme jinjen, un de Blinje zajgen; un zee feharrlichten Iesra’eel  äa Got.

32  Un Jeezus roopt ziene Jinja nö zikj zelfst un zäd, „Ekj ha Metleet op de Shoa, wiels zee zenn öl met mie jewast fe dree Däujgel, un han nusht too äten jehaut. Un ekj wel ent nich hunjrich waich shekjen, doamet zee nich feshmachten op dem Waich.

33  Dan zäden ziene Jinja too am, „Wua ku wie jenüach Broot kjrian en de Wiltnis zoone groote Shoa zaut too mäakjen?“

34  Jeezus zäd too ent, „Woo fäl Bulkjes ha jie?“ Un zee zäden, „Zäwen, un un poa kjliene Fesh.“

35  Dan beföl hee de Shoa toom op de Iad döl zeten.

36  Un hee noom de zäwen Bulkjes un de Fesh un jeef Dank, brüak dee un jeef dee nö ziene Jinja; un de Jinja jeewen nö de Shoa.

37  Un zee eeten aula un worrden zaut, un zee noomen zäwen groote Kjarrw fol fon de Broken waut äwajebläwen wiarren.

38  Nü dee waut jejäten hauden wiarren feeja düzent Mana, bezied Früjes un Kjinja.

39  Un hee shekjt de Shoa waich, un stäch en det Boot nen, un kjeem nö de Jäajent fon Magdala.