5:1  Wäa’ema jleewt daut Jeezus de Kjrist es, es fon Got jeboorren, un jieda’eena waut däm leewt waut  ons födad, leewt uk däm waut fon am jefödat es.

2  Derrch dit weet wie daut wie Got ziene Kjinja leewen, wan wie Got leewen un ziene Jebooten hoolen.

3  Dan dit es de Leew fon Got, daut wie ziene Jebooten hoolen. Un ziene Jebooten zenn nich ne Belaustunk.

4  Dan wautema fon Got jeboorren es äwasteit de Welt. Un dit es de Ziech waut de Welt äwasteit, ons Gloowen.

5  Wäa es dee waut de Welt äwawindt, öba dee waut jleewt daut Jeezus de Zän fon Got es?

6  Dit es dee waut kjemt derrch Wöta un Bloot, Jeezus Kjristus; nich bloos derrch Wöta, öba Wöta un Bloot. Un daut es de Jeist waut Seichnis dräicht, wiels de Jeist es Woarheit.

7  Dan doa zenn dree waut Seichnis dräujgen en dem Himel: de Föda, det Wuat, un de Heilja Jeist; un dize dree zenn eent.

8  Un doa zenn dree waut Seichnis dräujgen op Iaden:[1] de Jeist, det Wöta, un det Bloot; un dize dree stemen aus eent.

9  Wan wie dem Seichnis fon Menschen aunnämen, de Seichnis fon Got es jrata; dan dit es de Seichnis fon Got waut hee jeseicht haft fon dem Zän.

10  Dee waut aun Got zienem Zän jleewt haft dem Seichnis en zikj zelfst; dee waut Got nich jleewt haft am un Läajena jemäakt, wiels hee haft nich dem Seichnis jejleewt waut Got haft jejäwt fon zienem Zän.

11 Un dit es de Seichnis: Daut Got ons haft det eewjet Läwen jejäwt, un dit Läwen es en zienem Zän.

12  Dee waut dem Zän haft, haft Läwen; dee waut nich dem Zän haft, haft nich Läwen.

13  Dize Dinja ha ekj nö jünt jeshräwen dee doa aun dem Nömen fon Got zienem Zän jleewen, daut jie muchten weeten daut jie det eewjet Läwen han,[2] un daut jie muchten aunhoolen met jleewen en dem Nömen fon Got zienem Zän.

14  Nü dit es de Toofetrüjen waut wie en am han, daut wan wie irrjentwaut fräujgen nö zienem Welên nö, hee hiat ons,

15  Un wan wie weeten daut hee ons hiat, wautema wie fräujgen, wie weeten daut wie de Beden han nö waut wie han jefräacht.

16  Wan irrjenteena zienem Brooda zit ne Zind zindjen waut nich too dem Doot leidt, hee woat fräujgen, un hee woat am läwen jäwen fe dee waut Zind eewen waut nich toom Doot leidt.

17  Aule Onjeraichtichkjeit es Zind, un doa es ne Zind waut nich too dem Doot leidt.

18  Wie weeten daut wäa’ema fon Got jeboorren es eewt nich Zind; öba dee waut fon Got jeboorren es helt zikjzelfst, un de Beeza shiat am nich aun.

19  Wie weeten daut wie fon Got zenn, un de gaunse Welt licht en dem Beezen.

20  Un wie weeten daut Got zien Zän es jekömen un haft ons un Festentnis jejäwt, daut wie mäajen däm kjann waut doa Woa es; un wie zenn en däm dee doa Woa es, en zien Zän Jeezus Kjristus. Dit es de woara Got un det eewjet Läwen.

21  Kjliene Kjinja, hoolt jünt zelft fon Aufjeta. Amen.

13  De Kjinja fon de ütjewälde Zesta jreesen die. Amen.

[1] NU-un M-Taiksten löten de Wiad üt fon dem Himel en Farrsht 7 bot op Iaden en Farrsht 8.

[2] NU-Taikst lat det äwajet fon dize Farrsht üt.