16:1  Nü wäajen de Jeltzaumlunk fe de Heilje, zoo aus ekj Orrdash jejäwt ha too de Kjoakjen en Galatiejan, zoo mot jie uk doonn:

2  Aun dem iashten Dach fon de Wäakj löt jieda eenem fon jünt waut toozied laijen, doanö aus hee mucht toojenömen han, daut doa kjeene Jeltzaumlunk es wan ekj köm.

3  Un wan ekj köm, wämema jie gootzaijen derrch jüne Breew woa ekj shekjen toom jüne Göwen nö Jeruzalem brinjen.

4  Öba wan daut pausent es daut ekj uk gö, woarren dee met mie met gönn.

5   Nü ekj woa nö jünt kömen wan ekj derrch Masedöniejan gö, dan ekj gö derrch Masedöniejan.

6  Un daut mucht zenn daut ekj woa bliewen, ooda zoogoa met jünt winterrn, daut jie mie muchten op miene Reiz shekjen, wanema ekj gö.

7  Dan ekj wensch jünt nü too zeenn op mienem Waich; öba ekj höp un stootsje met jünt too bliewen, wan de Harr errlaubt.

8  Öba ekj woa lüarren en Efesus bot Pinkjsten.

9  Dan ne groote feshlachzome Däa es öpjegönn fe mie, un doa zenn fäle Jäajna.

10    Nü wan Timotäjus kjemt, zeet daut hee mucht bie jünt zenn önen angst; dan hee deit det Woakj fon dem Harrn, zoo aus ekj uk doo.

11  Doawäajens löt kjeenem am meiden. Öba shekjt am op ziene Reiz en Fräd, daut hee mucht nö mie kömen; dan ekj lüa fe am met de Breeda.

12  Nü wäajen ons Brooda Apolos, ekj muntad am strenj op nö jünt too kömen met de Breeda, öba hee wia simlich onwelich toom kömen too dize Tiet; öba hee woat kömen wan hee ne pausende Tiet haft.

13   Wäakt, stöt faust en dem Gloowen, ziet bröw, ziet stoakj.

14  Löt aules waut jie doonn met leew zenn.

15  Ekj munta jünt op, Breeda (jie kjann det Hüshault fon Stefanus, daut daut de iashte Fruchten wiarren fon Akäja, un daut zee zikj han zelfst hanjejäwt too dem Deenst fe de Heilje)

16  daut jie uk zoone unjadönn zenn, un too jieda eenem waut shauft un oabeit met ons.

17  Ekj zen froo wäajen Stefanus zienem kömen, Forrschünatus, un Akäjikus, dan waut daut aun jün Poat fäld fezorrjden zee.

18  Dan zee fereiwden mienem Jeist un jünem. Doawäajens aunerrkjant dee, waut zoo zenn.

19   De Kjoakjen en Aziejen jreesen jünt. Akwila un Prisila jreesen jünt herrtslich en dem Harrn, met de Kjoakj waut en äa Hüs es.

20  Aul de Breeda jreesen jünt. Jreest eena dem aundrem met un heiljen Kus.

21  De Grus es met miene äjene Haunt – Paulus ziene.

22  Wan irrjenteena dem Harrn Jeezus Kjristus nich leewt, löt am feflucht zenn. Ö Harr, Kom!

23  De Jnöd fon dem Harrn Jeezus Kjristus zie met jünt.

24  Miene Leew es met jünt aula en Kjristus Jeezus. Amen. (De iashta Breef nö de Korinta wia jeshräwen fon Filipie bie Stefanus un Forrschunatus un Akäjikus un Timotäjus.)