6:1  Wie dan, aus Oabeida toop met am pracherrn uk met jünt daut jie Got ziene Jnöd nich emzonst aun nämen.

3  Dan hee zaicht:

“En ne aunjenämne Tiet hiad ekj jünt,

          Un en dem Dach fon Radunk holp ekj

                jünt.” ^{Jez. 49:8}

Zeetemöl, nü es de aunjenämne Tiet; zeetemöl, nü es de Dach fon de Radunk.

3  Wie jäwen kjeen Stolpasteen en irrjent waut, daut de Deenst nich beshuldicht woat.

4  Öba en aule Dinja löw wie ons zelfst aus Got ziene Deena: En fäl Jedult, en Triebzaul, en Nooten, en Bedrekjungen,

5  en Striepen, en Jefangungen, en Wierwoarunk, en Oabeidungen, en Shlöploozichkjeiten, en Faustungen;

6  derrch Reinichkjeit, derrch Wissenshoft, derrch Jedult, derrch Leeftölichkjeit, derrch dem Heiljen Jeist, derrch derrzechtje Leew,

7  derrch det Wuat fon de Woarheit, derrch de Macht fon Got, derrch det Jewäa fon Jeraichtichkjeit aun de raichte Haunt un aun de linkje,

8  derrch Ia un Onia, derrch shlaichte Nörecht un goode Nörecht, aus Feleida, un doch aus Woa;

9  aus jekjant, un doch nich goot jekjant; aus stoawen un zeetemöl wie läwen; aus jeströft un doch nich Doot jemäakt;

10  aus trüarich, doch ema freelich; aus oam, doch fäle rikj mäaken; aus nusht han, un doch aule Dinja äjenn.

11  Ö jie Korinta! Wie han frie efentilcch jerädt too jünt, onze Hoaten zenn breet öp.

12  Jie zenn nich be’engt bie ons, öba jie zenn be’engt bie jüne äjene Felangungen.

13  Nü en trigj jäwen fe det nämelje (ekj räd aus too Kjinja), ziet uk öp.

14  Ziet nich onäwareen toop jelausht met Onjleewende. Dan waut fon Deel haft Jeraichtichkjeit met Jezatsloozichkjeit? Un waut fone Jemeenshoft haft Licht met Diestanis?

15  Un waut fon Äwareenstemunk haft Kjristus met Bieliejel? Ooda woon Poat haft un Jleewenda met un Onjleewenden?

16  Un waut fone Bestemunk haft Got zien Tempel met Aufjeta? Dan jie[1] zenn de Tempel fon dem läwenjen Got. Zoo aus Got haft jezaicht:

 „Ekj woa mank ent wönn

          Un mank ent gönn.

          Ekj woa äa Got zenn,

          Un zee woarren miene Menschen

                zenn.“ ^{3 Mo 26:12; Jer 32:38 Heez 37:27}

17  Doawäajens

“Kömt rüt fon mank ent

          Un ziet jie üteneen, zaicht de Harr.

          Shiat nich daut  waut onrein es aun,

          Un ekj woa jünt aunnämen.“^{Jez 52:11; Heez 20:34,41}

18  “Ekj woa un Föda zen too jünt, Un jie zelen miene Zäns un Daichta zenn, Zaicht de Aulmechtja HARR.“^{2 Zam 7:14}

[1] NU-Taikst last  wie.