1:1 Det Büak fon Jeezus Kjristus ziene Jeneratsjoonen, de Zän fon Dawied, de Zän fon Abraham.

2  Abraham födad Iezak, Iezak födad Jakob,  Jacob födad Jüda un ziene Breeda.

3  Jüda födad Perez  un Zera derrch Tämar,  Perez födad Hetsron,un Hetsron födad Ram.

4  Ram födad Aminadab,  Aminadab födad Nashon,  Nashon födad Salmon.

5  Salmon födad Bö’az derrch Rahab, Bö’az födad Öbed derrch Rüt, un Öbed födad Jesie,

6  un  Jesie födad Dawied dem Kjenich. Dawied de Kjenich födad Zolomön  derrch dee, dee de Frü fon Uraija jewast wia .

7   Zolomön födad Röbö’am, Röbö’am födad Abieja, un  Abieja födad Asa.[1]

8   Asa födad Jehoshafat, Jehoshafat födad Joaram, un Joaram födad Uzieja.

9  Uzieja födad Jötam, Jötam födad Ahaz, un  Ahaz födad Hezekieja.

10  Hezekieja födad Manasie, Manasie födad Amon, un  Amon födad Jözieja.[2]

11  Jözieja födad Jekonieja un ziene Breeda rom de Tiet aus zee worrden nö Babiloon jefiat.

12  Un nö däm daut zee nö Babiloon jebrocht wiarren, Jekonieja födad Shialtiel, un Shialtiel födad Zerubabel.

13  Zerubabel födad Abiejüd, un Abiejüd födad Eliejakim, un  Eliejakim födad Atsoar.

14  Atsoar födad Zädok, un Zädok födad Akiem, un  Akiem födad Eliejüd.

15  Eliejüd födad Eliejazor, Eliejazor födad Matan, un  Matan födad Jakob.

16  Un  Jakob födad Jösef, Marieja äa Maun, fon wäm Jeezus jeboorren wia, dee doa Kjristus heet.

17  Zoo dan, aul de Jeneratsjoonen fon Abraham bot Dawied zenn fiatian Jenneratsjoonen, fon Dawied bot de Babiloonishe Jefangenshoft wiarren fiatian Jeneratsjoonen, un fon de Babiloonishe jefangenshoft bot Kjristus zenn fiatian Jeneratsjoonen.

18    Nü, Jeezus ziene jeburrt wia zoo aus hia folcht. Nö däm daut ziene Muta Marieja en Felafnis wia met Jösef, eeja zee toop kjeemen, worrt arr jefungen met Kjint fon dem Heiljen Jeist.

19  Jösef dan, äa Maun, wia un jeraichta Maun un wul arr nich un auljemeenet Fäabilt mäakjen, un haud en dem Zen arr jeheemlich loos too löaten.[3]

20  Öba aus hee zikj dize Dinja äwadocht, zeetemöl, un Enjel wees op en un Droom un zäd, „Jösef, dü Zän fon Dawied, zie nich angst Marieja diene Frü nö die too nämen, dan daut waut en arr jenömen haft es fon dem Heiljen Jeist.

21  Un zee woat un Zän too Welt brinjen, un dü zaust zienem Nömen Jeezus nann, dan Hee woat ziene Menschen raden fon äare Zinden.

22  Nü aul dit worrt Jedönn daut daut mucht en errfelung gönn waut jerädt wia bie dem Harrn derrch dem Profeet dee doa zäd,

23  „Zeetemöl, ne Junkfrü woat met Kjint zenn, un woat un Zän dräujgen, un zee woarren am Gimanu’el nann“ waut doa fedolmescht es, „Got met ons“. ^{Jez 7:14}

24  Dan aus Jösef fon zienem shlöp opwaikjt, deed hee zoo aus de Enjel am befölen haud un noom ziene Frü nö zikj,

25  un kjand arr nich bot zee äarem iashtjeboorrnen Zän haud too Welt jebrocht. Un hee nand zienem Nömen Jeezus.[4]

[1] NU-Taikst last Asaf.

[2] NU-Taikst last Amos.

[3] Eehesheedinj.

[4] NU-Taikst last un Zän, endestäd fon iashtjeboorrnen.