18:1 Too dee Tiet kjeemen de Jinja nö Jeezus un zäden, “Wäa es dan det jratste en det Himelrikj?”

2  Dan roopt Jeezus un kjlienet Kjint nö zikj, zat am en äare med,

3  un zäd, “Gauns entshieden zaij ekj too jünt, büta jie omjekjiat woarren un zoo woarren aus kjliene Kjinja, woa jie äwa kjeen waich en det Himelrikj nen gönn.

4  “Doawäajens, wäa’ema zikj deemüticht zoo aus dit kjlienet Kjint, es det jratste en det Himelrikj.

5  “Wäa’ema een zoon kjlienet Kjint opnemt en mienem Nömen, nemt mie op.

6  “Öba wäa’ema eent fon dize kjliene waut aun mie jleewt fe’uazakt too zindjen, daut wuad bäta zenn fe däm wan un Mälsteen rom zienem Hauls jehunjen worrt, un dee en de deepe Zee fezöpen worrt.

7  “Wee too de Welt wäajen Beleidjungen! Dan Beleidjungen moten kömen, öba wee too däm Mensch derrch wäm de Beleidjungen kömen!

8  “Wan diene Haunt ooda Foot die fe’uazakt toom zindjen, shnied dee auf un shmiet dee wiet fon die. Daut es bäta fe die fekjräpelt en det Läwen nen too gönn, aus twee Henj ooda twee Feet han en det eewjet Fia nen too shmieten.

9  “Un wan dien Üajg die fe’uazäakt toom zindjen, riet daut üt un shmiet daut fon die. Daut es bäta en det Läwen nen too gönn met een Üajg aus toom en de Hal nen jeshmäten woarren met twee Üajgen.

10  “Paust op daut jie nich eent fon dize Kjliene fe‘achten, dan ekj zaij too jünt daut äare Enjeln zeenn ema mienem Föda zien Jezecht, dee doa en dem Himel es.

11  “Dan de Menschenzän es jekömen toom daut raden waut feloarren es.[1]

12  “Waut denkj jie? Wan un Mensch hundat Shöp haft, un eent fe’errt, felat hee nich de näajen un näajentich un jeit en de Boaj toom det fe’errde Shöp zäkjen?

13  “Un wan hee daut finkjt, zecha, zaij ekj too jünt, freit hee zikj meeja äwa daut Shöp aus äwa de näajen un näajentich waut nich fe’errt jinjen.

14  “Kriakt zoo es daut nich dem Föda, waut en dem Himel es, zienem Welen daut eent fon dize kjliene zul fekömen.

15  “Un wan dien Brooda jäajen die zindicht, gö un zaij am ziene Shult tweshen die un am auleen. Wan hee die hiat, hast dü dienem Brooda jewonn.

16  Öba wan hee die nich hiat, nem eent ooda twee meeja, daut ‘derrch det Mül fon eent ooda twee Seijen jieda Wuat mucht bestendicht zenn. ^{5 Moo 19:15}

17  “Un wan hee dee nich hiat, zaij de Kjoakj. Öba wan hee dee nich horrcht, löt am too die zenn aus un Heid ooda un Takskolaikta.

18  “Zecha, zaij ekj too jünt, wautema jie binjen op Iaden woat öl jebungen zenn en dem Himel, un wautema jie loos löten op Iaden woat öl loos jelöten zenn en dem Himel.

19  “Ekj zaij wada too jünt daut wan twee fon jünt toopstemen op Iaden äwa irrjentwaut waut zee fräujgen, daut woat Jedönn woarren fe ent bie mienem Föda en dem Himel.

20  “Dan wua twee ooda dree toop jezaumelt zenn en mienem Nömen, doa zen ekj en äare med.“

21  Dan kjeem Peetrus nö am un zäd, “Harr, woo fäaken zaul mien Brooda jäajen mie zindjen, un ekj fejäw am? Bot zäwen möl?“

22  Jeezus zäd too am, „Ekj zaij nich too die bot zäwen möl, öba bot säwentich möl zäwen.

23  “Doawäajens es det Himelrikj zoo aus un jewesa Kjenich waut wul feräakjnen met ziene Deena.

24  “Un aus hee haud aunjefongen too feräakjnen, worrt eena nö am jebrocht waut am tian düzent Talenten shuldich wia.

25  “Öba aus hee nich kun betölen, beföl zien Meista daut hee zul fekoft woarren met ziene Frü un Kjinja un aules waut hee haud, un daut Tölunk zul jemäakt woarren.

26  “Doawäajens fol de Deena döl ferr am un zäd, „Meista, zie jeduldich met mie, un ekj woa die aules betölen.‘

27  “Dan wia dem Deena zien Meista jeriat met Metleet , un leet am loos, un fejeef am ziene Shult.

28  “Öba dee Deena jinkj rüt un funk eenem fon ziene Metdeena waut am hundat Denarai shuldich wia, un läd ziene Henj aun am un neem am bie dem Haults un zäd, ‚Betöl mie waut dü shuldich best!‘

29  “Dan fol zien Metdeena döl bie ziene Feet un prachad am un zäd, „Zie jeduldich met mie, un  ekj woa die aules betölen.‘

30  “Un hee wul nich, öba jinkj un shmeet am en det Jefenkjnis bot hee zul de Shult betölen.

31  “Öba aus ziene Metdeena zajgen waut Jedönn wia, wiarren zee zeeja fetrüat, un kjeemen un fetalden äa Meista aules waut Jedönn wia.

32  “Dan, aus zien Meista am jeroopt haud, zäd hee too am, ‚Dü shlaichta Deena! Ekj fejeef die aul diene Shult wiels dü mie prachazhd.

33  ‘Zus dü nich uk han Metleet jehaut met dienem Metdeena, kraikt zoo aus ekj errboarrmunk haud äwa die?“

34  “Un zien Meista wia dol, un äwajeef am nö de Tüaleida bot hee zul aules betölen waut hee am shuldich wia.

35  “Zoo woat mien Himelsha Föda uk too jünt doonn wan jieda eena fon jünt nich fon zien Hoat zienem Brooda ziene äwaträdungen fejeft.”[2]

[1] NU-Taikst lat dize Farrsht üt.}

[2] NU-Taikst lat ziene Äwaträdungen üt.