1:1  De Öpenboarunk fon Jeezus Kjristus, woone Got am jeef toom ziene Deena Dinja wiezen waut en dem korrten moten pesiarren. Un hee shekjt un betäkjend daut derrch zienem Enjel too zienem Deena Jehanes,

2  dee Seichnis drüach too Got zien Wuat un too dem Seichnis fon Jeezus Kjristus, too aul dee Dinja waut hee zach.

3  Jezäajent es dee waut last un dee waut de Wiad fon dize Profetseijunk hiarren, un dee Dinja hoolen waut doa benen jeshräwen zenn; dan de Tiet es dicht bie.

4  Jehanes, too de zäwen Kjoakjen waut en Azien zenn: Jnöd too jünt un Fräd fon däm dee doa es, un dee doa jewast es, un dee doa too kömen es, un fon de zäwen Jeista waut ferr zienem Troon zenn,

5  un fon Jeezus Kjristus, de trüja Seij, de Iashtjeboorrna fon de Doodes, un de Harrsha äwa de Kjenichs fon de Iad. Too däm dee ons leewd un ons wosh[1] fon onze Zinden en zien äjenet Bloot,

6  un haft ons Kjenichs[2] jemäakt un Priesta too zienem Got un Föda, too am zie Harrlichkjeit un Harrshoft fe’ema un fe’ema. Amen.

7  Zeetemöl, hee kjemt met de Wolkjen, un jieda Üajg woat am zeenn, zoogoa dee waut am derrch spekten. Un aul de Stam fon de Iad woarren trüarren wäajen am. Un doch, Amen.

8  „Ekj zen de Alfa un de Ömäga, de Aunfank un det Enj,“[3] zaicht de Harr, „dee doa es un dee doa wia un  dee doa too kömen es, de Aulmechtja.“[4]

9  Ekj, Jehanes, beides jün Brooda un Bejleita en de Triebzaul un det Rikj, un Jedult fon Jeezus Kjristus, wia op de Inzel waut doa Patmos jenant es, fe Got zien Wuat un fe dem Seichnis fon Jeezus Kjristus.

10  Ekj wia en dem Jeist aun dem Harrn zienem Dach, un hiad hinja mie ne Lüde Stem, aus fon un Trompeet,

11  un zäd, “Ekj zen de Alpha un de Ömäga, de Iashta un de Latsta,”[5] un, “Waut dü zitst, shriew en un Büak un shekj daut nö de zäwen Kjoakjen waut en Azien zenn:[6] nö Efesus, nö Smirrna, nö Perrgamos, nö Tiejatiera, nö Sarrdis, nö Filadelfiejan, un nö La’ödiseijan.”

12  Dan dreid ekj toom de Stem zeenn waut met mie räd. Un aus ekj jedreit wia zach ekj zäwen goldne Laumpenhoola,

13  un en de med fon de zäwen Laumpenhoola eenum en dem bejlikj zoo aus de Menschenzän, jekjleedt met un Rok unjen bot de Feet un jegorrt rom de Brost met un goldnen Gort.

14  Zien Kop un ziene Hoa wiarren wit zoo aus Wol, zoo wit aus Shnee, un ziene Üajgen wiarre zoo aus ne Fiaflaum;

15  Ziene Feet wiarren zoo aus reine Mezinkj, aus wan en un Hetöwen feshmolten, un ziene Stem aus det Jelüd fon fäle Wöta;

16  Hee haud en ziene raichte Haunt zäwen Stiarrn, üt zien Mül jinkj un twee-shnetjet Shwiat, un zien Jezecht wia zoo aus de Zon wan dee en äare Krauft shient.

17  Un aus ekj am zach, fol ekj han bie ziene Feet aus Doot. Öba hee läd ziene raichte Haunt op mie, un zäd too mie, „Zie nich angst; ekj zen de Iashta un de Latsta.

18  “Ekj zen dee waut läwt, un Doot wia, un zeetemöl, ekj läw fe’ema meeja. Amen. Un ekj ha de Shlätels fon Hädiez un fon dem Doot.

19  “Shriew, de Dinja waut dü jezeenn hast, un de Dinja waut zenn, un de Dinja waut woarren pesiarren  nö dit.

20  “De Jeheemnis fon de zäwen Stiarrn waut dü zachst en miene raichte Haunt, un de zäwen goldne Laumpenhoola: De zäwen Stiarrn zenn de zäwen Enjeln fon de zäwen Kjoakjen, un de zäwen Laumpenhool waut dü zachst zenn de zäwen Kjoakjen.

[1] NU-Taikst last ons loos müak; M-Taikst last leewd ons un wosht.

[2] NU-un M-Taiksten zaijen un Rikj.

[3] NU-un M Taiksten löten üt de Aunfank un det Enj.

[4] NU- un M- Taiksten laijen Got bie.

[5]  NU un M Taiksten löten üt “Ekj zen de Alpha un de Ömäga, de Iashta un de Latsta,”

[6] NU un M Taiksten löten en Aziejan üt.