1:1  Paulus, un Sklöw fon Jeezus Kjristus, jeroopt un Apostel too zenn, jesheedt too det Eefanjeeliejum bie Got,

2  waut hee fespräaken haud derrch de Profeeten en de Heilje Shreften,

3  wäajen zienem Zän Jeezus Kjristus onzem Harrn, dee jeboorren wia fon det Zöt fon Dawied nö det Fleesh nö,

4  un beheipt de Zän fon Got met Krauft nö dem Jeist fon Heilichkjeit nö, derrch de Oparrstönunk fon de Doodes.

5  Derrch am ha wie Jnöd un Apostelaumt jekjräajen fe Jehoorrzomkjeit too dem Gloowen mank aule Natsjooenen fe zienem Nömen,

6  mank wäm jie uk de Jeroopde fon Jeezus Kjristus zenn;

7  Too aul dee waut en Room zenn, Jeleewde fon Got, jeroopt Heilje too zenn: Jnöd too jünt un Fräd fon onzem Föda un dem Harrn Jeezus Kjristus.

8   Iashtens, ekj dank mienem Got derrch Jeezus Kjristus fe jünt aula, daut jerädt woat fon jünem Gloowen derrch de gaunse Welt.

9  Dan Got es mien Seichnis, wäm ekj deen met mienem Jeist en det Eefanjeeliejum fon zienem Zän, daut ekj önen ophiarren jünt ema en miene Jebäda aun dem Denkj hool,

10  un mäak Aunfräujg wan, derrch irrjent un Waich, ekj nü too latst mucht mienem Waich finjen en Got zienem Welen, toom nö jünt kömen.

11  Dan ekj felang jünt too zeenn, daut ekj mucht irrjent ne jeistelje Göw nö jünt jäwen, zoo daut jie muchten Staunthauft woarren,

12  daut es, daut ekj mucht errmootjicht woarren toop met jünt derrch dem Jemeenzomen Gloowen beides fon jünem un fon mienem.

13  Nü ekj wel nich daut jie zulen onjewoa zenn Breeda, daut ekj fäaken plönd nö jünt too Kömen, öba wia jehindat bot nü too, daut ekj uk mucht weset Frucht han mank jünt, kraikt zoo aus mank aundre Ütlenda.

14  Ekj zen Shildna beides too de Jriechen un too de Barrbariejen, beides too de Weize un de Onwieze.

15  Un zoo, zoo fäl aus en mie es, zen ekj reed det Eefanjeeliejum too prädjen too jünt, dee doa uk en Room zeenn.

16    Dan ekj shäm mie nich fe det Eefanjeeliejum fon Kjristus, dan daut es de Krauft fon Got too de Radunk fe jieda’eenem waut doa jleewt, too dem Jüd iasht un uk too dem Jriechen.

17  Dan doa‘en es de Jeraichtichkjeit fon Got je‘öpenboat fon Gloowen bot Gloowen; dan daut es jeshräwen, „De Jeraichte zelen läwen derrch dem Gloowen.“ ^{Ha 2:4}

18  Dan de Oaja fon Got es je‘öpenboat fon dem Himel jäajen aule Gotloozichkjeit un Onjeraichtichkjeit fon Menschen, dee de Woarheit döl drekjen en Onjeraichtichkjeit,

19  wiels waut jeit too weeten fon Got es öpenboa en ent, dan Got haft ent daut jewäzen.

20  Dan fon de Shepfunk fon de Welt wiarren ziene onzechboare Dinja kloa too zeenn, wiels dee zenn festentlich derrch de Dinja waut jemäakt zen, zoogoa ziene eewje Krauft un jetlichkjeit, zoo daut dee önen Entshuldjunk zen,

21  wiels, aus zee Got kjanden, feharrlichten zee am nich aus Got, un wiarren uk nich Dankboa, öba worrden nutsloos en äare Jedanken, un äare noareshe Hoaten worrden fedunkelt.

22  Wielt zee zikj talden aus Weize, worrden zee Noarren,

23  un fe’endaden de Harrlichkjeit fon dem onfejenkjlichen Got nö un Aufbilt fon fejenkjlichen Mensch nö, un Fäajel un feeja-footje Tiaren un kjrüpende Dinja.

24  Doawäajens, jeef Got ent uk op nö Onreinichkjeit, en de Losten fon äare Hoaten, toom äare Kjarrpash oniarren mank zikj zelfst,

25  dee doa de Woarheit fon Got fetüshten fe un Läj, un bäden det Shepfunk aun un deenden daut, leewa aus dem Shepfa, dee doa fe’ema jezäajent es. Amen.

26  Fe dize Uazäak jeef Got ent op nö oniaboare Felangungen. Dan zoogoa äare Frümeschen fetüshten dem natürrlichen jebruk fe waut jäajen Natüa es.

27  Kjraikt zoo uk de Mana, feleeten dem Natürrlichen jebruk fon de Frü, un brenden en äare Losten eena fe dem aundrem, Mana met Mana beläwden waut shaundhauft es, un kjräjen en zikj zelfst de Ströf fon äarem Fäla waut doa shuldich wia.

28  Un zoo aus zee nich jleichten Got en äare Wissenshoft too hoolen, jeef Got ent äwa too un Zen waut nich sheeden kaun, toom Dinja doonn waut nich pausent zen;

29  un wiarren jefelt met aulet Onjeraichtichkjeit, [1]Hürarie, Boosheit, Habzucht, Grol, fol fon Neid, Morrt, Striedzucht, Fefiarunk, Shlaichtzenich; Pludarie,

30  hinjariksh räden, Goteshasa; Jewaulteewa, Stolt, Pröla, Boosheit ütfinjen, Onjehoorrzom too Elerrn,

31  kjenn nich sheeden, nich too trüjen, Onleewent, [2]Onfejäwlich, Metliedloos;

32  dee, wielt zee det jeraichtet Jerecht fon Got kjanden, daut dee waut zoone Dinja begönn zikj dem Doot fedeenn, doonn nich bloos det zelwje, öba stönn dee uk bie waut zoone Dinja doonn.

[1] NU-Taikst lat Hürarie üt.

[2] NU-Taikst lat Onfejäwlich üt.