14:1  Nämt zoonem aun dee doa shwak es en dem Gloowen, öba nich too Striedarie äwa onzechre Dinja.

2  Dan eena jleewt hee mach aules äten, öba dee waut shwak es at bloos Jekjäaks.

3  Löt däm waut at nich däm fe’achten waut nich at, un löt nich däm dee nich at däm  rechten waut at; dan Got haft am aunjenömen.

4  Wäa best dü un aundrem zienem Deena too rechten? Too zienem äjenen Meista steit hee ooda felt. Werrkjlich, hee woat toom stönn jebrocht woarren, dan Got kaun am mäaken stönn.

5  Eena talt een Dach hecha aus dem Näaksten; un aundra talt jieda Dach äwareen. Löt jieda eenem bestemt zen en zienem äjenen Zen.

6  Dee waut dem Dach helt, helt däm too dem Harrn; un dee waut dem Dach nich helt, too zienem Harrn helt he däm nich. Dee waut at, at too dem Harrn, dan hee jeft Got Dank; un dee waut nich at, too dem Harrn at hee nich, un jeft Got dank.

7  Dan kjeena fon ons läwt too zikj zelfst, un kjeena stoawt too zikj zelfst.

8  Dan wan wie läwen, läw wie too dem Harrn; un wan wie stoawen, stoaw wie too dem Harrn. Doawäajens aus wie läwen ooda stoawen, ze wie dem Harrn ziene.

9  Dan too dit Enj storrf Jeezus un stunt wada op un läwt wada, daut hee mucht Harr zen beides fon de Doodje un de Läwenje.

10  Öba wuarom rechst dü dienem Brooda? Ooda wuarom fe’achst dü dienem Brooda? Dan wie woarren aula ferr Jeezus ziene Rechta Zet stönn.

11  Dan daut es jeshräwen:

“Zoo aus ekj läw, zaicht de HARR,

                jieda Kjnee woat bäjen too mie,

          Un jieda Tung woat too Got bekjann.” Jez 45:23

12  Zoo dan woat jieda eena fon ons Räakjenshoft jäwen fe zikj zelfst too Got.

13  Doawäajens löt ons nich meeja eena dem aundrem rechten, öba leewa dit beshlüten; nich un Stolpasteen ooda ne Uazäak toom faulen en onzem Brooda zienem Stich too laijen.

14  Ekj weet un zen biejebrocht bie dem Harrn Jeezus daut doa es nuscht onreinet üt zikj zelfst; öba too däm dee irrjentwaut onrein talt too zenn, too däm es daut onrein.

15  Doch wan dien Brooda bedrekjt es äwa dien Äten, dan jeist dü nich meeja en Leew. Doo nich däm fedoawen met dien Äten fe wäm Kjristus storrf.

16  Doawaäjens löt nich shlaichtet jerädt woarren äwa dien goodet;

17  dan det Gotesrikj es nich äten un drinkjen, öba Jeraichtichkjeit un Fräd un Freid en dem Heiljen Jeist.

18  Dan dee waut Kjristus deent en dize Dinja[1] es aunjenäm too Got un es gootjezaicht bie Mensch.

19  Doawäajens löt ons dee Dinja nöfoarren waut fe Fräd mäaken un de Dinja bie waut wie eena dem aundrem kjenn opbüjen.

20  Doo nich Got zien Woakj fenichten fe Äten. Aule Dinja zen werrkjlich rein, öba dat es shlaicht fe däm Mensch waut doa at met Beleidjunk.

21  Daut es goot nich Fleesh too äten ooda Wien too drinkjen ooda irrjent waut too doonn derrch woont dienem Brooda stolpat ooda beleidichst woat [2]ooda es shwak jemäakt.

22  [3]Hast dü Gloowen? Ha daut too die zelfst ferr Got. Froo es dee waut zikj nich zelfst fedaumt en daut waut hee gootheit.

23  Öba dee waut düat es fedaumt wan hee at, wiels hee at nich derrch Gloowen; dan wautema nich fon Gloowen es, es Zind.[4]

[1] NU-Taikst last dit.

[2] NU-Taikst lat üt ooda es shwak jemäakt .

[3] NU-Taikst last De Gloowen waut dü hast, ha.

[4] M-Taikst haft Reem. 16:25-27 hia.