8:1  Doawäajens es doa dan nü kjeen Fedaumnis too dee waut en Kjristus Jeezus zenn, dee doa nich nö det Fleesh nö gönn, öba nö dem Jeist nö.

2  Dan det Jezats fon dem Jeist fon det Läwen en Kjristus Jeezus haft mie frie jemäakt fon det Jezats fon Zind un dem Doot.

3  Dan waut det Jezats nich kun doonn en daut daut shwak wia derrch det Fleesh, deed Got derrch zienem Zän shekjen en dem änlichen fon zinteljet Fleesh, wäajen Zind: un hee fedaumd Zind en det Fleesh,

4  daut de jeraichte Felangungen fon det Jezats muchten errfelt woarren en ons dee doa nich nö det Fleesh nö gönn öba nö dem Jeist nö.

5  Dan dee waut nö det Fleesh nö läwen stalen äare Zens op de Dinja fon det Fleesh, öba dee waut nö dem Jeist nö läwen, de Dinja fon dem Jeist.

6  Dan toom fleeshlich jezonn zen es de Doot, öba Jeistlich jezonn too zen es Läwen un Fräd.

7  Wiels de fleeshelja Zen es fientshoft jäajen Got; dan daut es nich Got zien Jezats unjadönn, un werrkjlich, kaun uk nich zen.

8  Zoo dan, dee waut en det Fleesh zen kjenn Got nich un jefaulen brinjen.

9  Öba jie zen nich en det Fleesh öba en dem Jeist, wan de Jeist werrkjlich en jünt hüziat. Nü wan irrjent eena nich dem Jeist haft, dee es nich ziena.

10    Un wan Kjristus en jünt es, es de Kjarrpa Doot wäajen Zind, öba de Jeist es Läwen wäajen de Jeraichtichkjeit.

11  Öba wan de Jeist fon däm dee doa Jeezus oprecht fon de Doodes en jünt hüziat; dee, dee doa Kjristus oprecht fon de Doodes woat uk läwen jäwen too jüne stoafliche Kjarrpash derrch zienem Jeist waut en jünt hüziat.

12  Doawäajens, Breeda, wie zen Shildna, nich too det Fleesh, toom nö det Fleesh nö läwen.

13  Dan wan jie nö det Fleesh nö läwen woa jie stoawen; öba wan jie derrch dem Jeist de Döten fon dem Kjarpa Doot mäaken, woa jie läwen.

14  Dan zoo fäl aus jeleidt zen derrch Got zienem Jeist, dit zen Got ziene Zäns.

15  Dan jie kjräjen nich dem Jeist fon Sklöwenheit toom ferrchten, öba jie kjräjen dem Jeist fon de Adoptiarunk derrch wäm wie üt roopen, „Aba Föda.“

16  De Jeist Zelfst draicht Siechnis met onzem Jeist daut wie Got ziene Kjinja zen

17 un wan Kjinja, dan Oawen, Oawen fon Got un Metoawen met Kjristus, wan wie werrkjlich met am lieden, daut wie uk muchten toop feharrlicht zen.

18  Dan ekj tal de Liedungen fon dize Tiet nich wiat too fejlikjen met de Harrlichkjeit waut woat öpenboat woarren too ons.

19  Dan de iarrenste Toofetrüjen fon de Kjreejatüa lüat jiarrn fe de öpenboarunk fon Got ziene Zäns.

20  Dan de Kreejatüa wia unjadönn too Onjelungenheit, nich welich, öba wäajen däm waut aules unjadönen mäakt en Höpninj;

21  wiels de Kjreejatüa zelfst woat uk jeradt woarren fon de Sklöwarie fon Fedoawnis en de veharrlichte Frieheit fon Got ziene Kjinja nen.

22  Dan wie weeten daut de gaunse Kjreejatüa stänt un rakat met Jeburrtsweejen toop bot nü.

23  Nich bloos daut, öba wie uk, waut de iashte Frucht fon dem Jeist han, zoogoa wie zelfst stänn en ons zelfst, un lüarren tigja fe de Adoptiarunk, de Looskjeepunk fon onzem Kjarrpa.

24  Dan wie wiarren jeradt en dize Höpninj, öba Höpninj waut jezeenn es es nich Höpninj; dan wuarom höpt eena fe daut waut eena zit?

25  Öba wan wie höpen fe daut waut wie nich zeenn, dan lüa wie tigja fe daut met Äwawindunk.

26   Zoo halpt de Jeist uk en onze shwakheiten. Dan wie weeten nich fe waut wie zulen bäden zoo aus needich es, öba de Jeist zelfst steit en fe ons met Stänungen waut nich üttoospräakjen gönn.

27  Nü dee waut de Hoaten unjazäkt kjant waut de Zen fon dem Jeist es, wiels hee mäakt Medeljebäda fe de Heilje nö Got zienem Welen nö.

28  Un wie weeten daut aule Dinja toop toom gooden shaufen fe dee waut Got leewen, too dee waut jeroopt zen nö zienem Aufzecht.

29  Dan wäm hee en dem Ferüt kjand, deed hee uk üttäkjen toom en zienem Zän zienem Aufbilt jeforrmt too woarren, daut hee mucht de Iashtjeboorna zen fon fäle Breeda.

30  Un wieda, wäm hee üttäkjend, dize roopt hee uk; un wäm hee roopt, dize deed hee uk raichtfoadjen; un wäm hee raichtfoadicht, dize feharrlicht hee uk.

31   Waut zul wie dan zaijen too dize Dinja? Wan Got fe ons es, wäa kaun dan jäajen ons zen?

32  Dee wäa nich zienem äjenen Zän spoad, öba jeef am nop fe ons aula, woo woat hee nich met am uk ons aule Dinja emzonst jäwen?

33  Wäa woat irrjent waut jäajen Got ziene Ütjewälde brinjen? Daut es Got waut Raichtfoadicht.

34  Wäa es dee waut fedaumt? Daut es Kjristus waut doa storrf, un doa’äwa, es uk opjestönn, dee doa aun de raichte Haunt zied fon Got es, dee doa uk Medeljebäda mäakt fe ons.

35  Wäa woat ons sheeden fon Kjristus ziene Leew? Woat Triebzaul, ooda Noot, ooda Fefoljunk, ooda Hungashnoot, ooda näaktich zen, ooda Jefoa, ooda det Shwiat?

36  Zoo aus daut jeshräwen es:

“Om dients haulwen woa wie dem Dach äwa

                 Doot jemäakt;

          Wie zen jetalt aus Shöp fe de Shlacht.“ ^{Ps 44:22}

37  Doch en aul dize Dinja ze wie meeja aus Jewena derrch däm waut ons leewd.

38  Dan ekj zen äwatseit daut nich Doot ooda Läwen, ooda Enjeln, ooda Machten ooda Kjreften ooda Dinja en de jäajenwuat ooda Dinja too kömen,

39  ooda Hecht, ooda Deep, ooda irrjent un aundret jemäakdet dinkj, haft de mäajlichkjeit ons fon Got ziene Leew too sheeden waut en Kjristus Jeezus onzem Harrn es.