3:1  Un ekj, Breeda, kun nich too jünt räden aus too jeistelje Menschen öba aus too fleeshelje, aus too Bäbes en Kjristus.

2  Ekj näad jünt met Mailkj un nich hoadet Äten; dan bot nü too ku jie daut nich aunnämen, un zoogoa kje jie daut noch nich;

3  dan jie zenn noch fleeshlich. Dan wua doa Aufgonst, Striedarie, un Deelungen mank jünt zenn, ze jie nich fleeshlich un fehoolen jünt aus Menschen?

4  Dan wan eena zaicht, “Ekj zen fon Paulus,“ un un aundra, „Ekj zen fon Apolos,“ ze jie nich fleeshlich?

5   Wäa dan es Paulus, un wäa es Apolos, öba Deena derrch wäm jie jejleewt han, zoo aus de Harr too un jiedrem jeef?

6  Ekj plaunt, Apolos wötad, öba Got jeef de Femiarunk.

7  Zoo dan es nich dee waut plaunt irrjentwaut, ooda dee waut wötad, öba Got dee de Femiarunk jeef.

8  Nü dee waut plaunt un dee waut wötat zenn eent, un jieda eena woat zienem äjenen Loon kjrian doa nö aus hee jeshauft haft.

9  Dan wie zenn Got ziene Metoabeida; jie zenn Got zien Flekj, jie zenn Got zien Jebied.

10  Nö de Jnöd fon Got nö, waut hee mie jejäwt haft aus un weiza Meista Büja, ekj ha dem Grunt jelaicht, un un aundra büt doa böwen. Öba löt un jiedrum oppausen woo hee doa böwen büt.

11  Dan kjeen aundra Grunt kaun irrjent eena laijen aus dee waut jelaicht es, waut doa Jeezus Kjristus es.

12  Nü wan irrjent eena büt op disem Grunt met Golt, Zelwa, Kjestliche Steena, Holt, Hei, Stroo,

13  jieda eenem ziene Oabeit woat kloa woarren; dan de Dach woat daut öpwiezen, wiels daut woat je‘öpenboat woarren derrch Fia; un det Fia woat un jiedrem zien Woakj proowen, fon waut fone zorrt daut es.

14  Wan irrjent eenem ziene Oabeit waut hee op daut jebüt haft üt helt, woat hee un Loon kjrian.

15  Wan irrjent eenem zien Woakj febrent, woat hee felus lieden; öba hee zelfst woat jeradt woarren, doch zoo aus derrch Fia.

16   Weet jie nich daut jie Got zienem Tempel zenn un daut Got zien Jeist en jünt wönt?

17  Wan irrjent eena dem Tempel fon Got fenicht, däm woat Got fenichten. Dan de Tempel fon Got es heilich, woon Tempel jie zenn.

18  Löt kjeenem zikjzelfst feleiden. Wan irrjent eena mank jünt shient weiz too zenn en dize Tiet, löt am un Noa woarren daut hee mucht weiz zenn.

19  Dan de Weisheit fon dize Welt es Noaheit met Got. Dan daut es jeshräwen, „Hee jript de Weize en äare äjene shlikjwäaj“; ^{Hie‘ob 5:13}

20  un wada, “De HARR weet de Jedanken fon de Weize, daut dee fejäws zenn.“ ^{Ps 94:11}

21  Doawäajens löt kjeenem puchen en Mensch. Dan aule Dinja zenn jüne:

22  aus Paulus ooda Apolos ooda Siefus, ooda de Welt ooda Läwen ooda Doot, ooda Dinja waut nü zenn ooda Dinja too kömen, aule Dinja zenn jüne.

23  Un jie zenn Kjristus ziene, un Kjristus es Got ziena.