2:1  Öba ekj recht dit en mie zelfst, daut ekj wuad nich wada nö jünt kömen en Trüa.

2  Dan wan ekj jünt trüarich mäak, wäa es dan dee waut mie froo mäakt öba dee waut trüarich es jemäakt derrch mie?

3  Un ekj shreef kraikt dit nö jünt, zust wan ekj köm, ekj zul Trüa han äwa dee fon wäm ekj zul Freid han, un ha dize Toofetrüjunk en jünt aula daut miene Freid es aul jüne Freid.

4  Dan üt fäl Älent un Angst fon Hoat shreef ekj nö jünt, met fäle Trönen, nich daut jie zulen bedrekt zenn, öba daut jie muchten de Leew weeten waut ekj zoo riew ha fe jünt.

5  Öba wan irrjent eena mie haft Trüa jebrocht, dee haft nich mie fetrüat, öba jünt too un weset, daut es nich too streng too zenn.

6  Dize Beströfunk waut jejäwt worrt bie de miarheit wia jenüach fe zoonem Mentsch,

7  zoo daut, aun dem jäajendeel, zul jie am nü leewa fejäwen un am treesten, zust fleicht woat zoona opjeshlukt met too fäl Triebzaul.

8  Doawäajens, sporrn ekj jünt aun daut jie jüne Leew too am bestädjen.

9  Dan too dit Enj shreef ekj, daut ekj jünt mucht op de Proow stalen aus jie Jehoorzom zenn en aule Dinja.

10  Nü wäm jie irrjentwaut fejäwen, ekj fejäw uk. Dan wan ekj irrjentwaut werrkjlich fejäwt ha, ekj ha däm Janjen fejäwt[1] om jünts haulwen en Kjristus ziene jäajenwuat,

11 zust met eenmöl zul de Zötön ons ütnutsen; dan wie zenn nich onwisent fon ziene Jedanken.

12  Un wieda, aus ekj nö Trö’az kjeem toom det Eefanjeeliejum prädjen, worrt ne groote Däa öp jemäakt too mie bie dem Harrn,

13  Ekj haud kjeen Rü en mienem Jeist, wiels ekj funk Tietus mienem Brooda nich; öba ekj noom aufsheet fon ent un feleet nö Masedöniejan.

14  Nü, Dank zie too Got dee ons ema nö dem Ziech en Kjristus leidt, un derrch ons fespreedt det sheenet Jeroch fon ziene Wisenshoft en jieda Städ.

15  Dan wie zenn too Got det Jeroch fon Kjristus mank dee waut jeradt woarren un mank dee waut fekömen.

16  Too dem eenem ze wie det Jeroch fon dem Doot waut too dem Doot leidt, un too dem aundrem det Jeroch fon det Läwen waut too det läwen leidt. Un wäa es jenüach fe dize Dinja?

17  Dan wie zenn nich zoo aus fäle[2] waut Got zien Wuat feshacherrn; öba zoo aus fon Luta, öba zoo aus fon Got räd wie en de Zecht fon Got en Kjristus.

[1] NU- Taikst last waut ekj ha fejäwt, wan ekj waut fejäwt ha, deed ekj det om jünts haulwen.

[2] M-Taikst last de äwaje.