3:1  Dan fe dize Uazäak ekj, Paulus, de Jefangna fon Kjristus Jeezus fe jünt Heiden,

2  (wan jie werrkjlich jehiat han fon de Fewaultunk fon Got ziene Jnöd waut mie jejäwt wia fe jünt,

3  woo daut derrch Öpenboarunk hee mie det Jeheemnis müak festönen, zoo aus ekj öl en dem korrten jeshräwen ha,

4  derrch woont, wan jie läzen, jie muchten miene Wisenshoft festönn en det Jeheemnis fon Kjristus,

5  waut en aundre Tieden nich wia löten weeten too de Zäns fon Mensch, zoo aus daut nü es öpenboat worrden derrch dem Jeist too ziene Heilje Aposteln un Profeeten:

6  daut de Heiden zulen Metoawen zenn, fon dem nämeljen Kjarrpa, un Deelnäma fon de Fespräakjunk en Kjristus derrch det Efangeliejum,

7  fon woont ekj un Deena zen jeworrden nö de Göw nö fon de Jnöd fon Got, jejäwt too mie derrch de feshlachzome Wirrkjunk fon ziene Krauft.

8  Too mie, dee doa det weinichste fon aul de Heilje zen, es dize Jnöd jejäwt, daut ekj zul mank de Heiden de Onbejriepliche Rikjdoms fon Kjristus prädjen,

9  un aulem mäaken zeenn waut de Jemeenshoft[1] fon det Jeheemis es, woont fon dem Aunfonk fon de Tieden festäaken wia en Got dee doa aules shauft derrch Jeezus Kjristus; [2]

10 fe de Ützecht daut nü de fälfache Weisheit fon Got mucht woarren löten weeten derrch de Kjoakj too aul de Machten un Kjreften en de Himelshe Städa,

11 nö dem eewjen Swak, waut hee jefoadicht haft en Kjristus Jeezus, onzem Harrn,

12 en wäm wie Driestheit un Toogank han met Troost derrch Gloowen en am.

13 Doawäajens fräujg ekj daut jie nich Hoat[3] feliarren wäajen miene Triebzauls fe jünt, waut jüne Harrlichkjiet es.)

14 Fe dize Uazäak bäj ekj miene Kjneejen too dem Föda fon onzem Harrn Jeezus Kjristus,[4]

15 fon wäm de gaunse Femielje en dem Himel un op Iaden jeneemt es,

16 daut hee jünt mucht jäwen, nö de Rikjdoms fon ziene Harrlichkjeit nö, jestoakt too woarren met Macht derrch zienem Jeist en dem enalichen Mensch,

17 daut Kjristus mucht en jüne Hoaten wönn derrch Gloowen; daut jie, wiels jie jewarrtelt un jejrindt zenn en Leew,

18 muchten kjenn fenämen met aul de Heilje waut de Breed, un de Lengd un de Deep un de Hecht es,

19 toom de Leew fon Kjristus weeten waut de Wisenshoft febie jeit; daut jie muchten jefelt zenn met aul de Folheit fon Got.

20  Nü too däm dee de mäajlichkjeit haft äwademöt, fäl möl meeja too doonn aus wie kjenn fräujgen ooda denkjen, nö de Krauft nö waut en ons wirrkjt,

21 too däm zie Harrlichkjeit en de Kjoakj derrch Kjristus Jeezus too aule Jeneratsjoonen, fe’ema un fe’ema. Amen.

[1]  NU- un M Taiksten läzen Hüshault ooda Fewaultunk.

[2] NU-Taikst lat Jeezus Kjristus üt.

[3]  Ooda Moot

[4]  NU Taikst lat Jeezus Kjristus üt.