Kapitel 3 JEHANES
3:1 Doa wia un Maun fon de Foarizäja dee heet Nikodeemus, un Leida fon de Jüden.
2 Dis Maun kjeem nö Jeezus bie Nacht un zäd too am, “Rabie, wie weeten daut dü un Liara best waut fon Got jekömen es; dan kjeena kaun dize Täkjens doonn waut dü deist büta Got es met am.
3 Jeezus auntwuad un zäd too am, “Gauns entshieden zaij ekj too die, büta eena wada jeboorren es, kaun hee Got zien Rikj nich zeenn.”
4 Nikodeemus zäd too am, “Woo kaun un Mensch jeboorren woarren wan hee iasht oolt es? Kaun hee toom tweedet möl en ziene Muta äa Lief nen kömen un jeboorren woarren?“
5 Jeezus zäd, “Gauns entshieden zaij ekj too die, buta eena fon Wöta un dem Jeist jebooren es, kaun hee nich en Got zien Rikj nen kömen.”
6 Daut waut fon det Fleesh jeboorren es, es Fleesh, un daut waut fon dem Jeist jeboorren es, es Jeist.
7 Doo nich staunn daut ekj too die zäd, ‘Dü motst wada jeboorren woarren.’
8 De Wint blöst wua dee well, un dü hiasht det Jelüd doafon, öba dü kaust nich zaijen wua dee häa kjemt un wua dee han jeit. Zoo es jieda ’eena waut fon dem Jeist jeboorren es.”
9 Nikodeemus auntwuad un zäd too am, “Woo kjenn dize Dinja zenn?”
10 Jeezus auntwuad un zäd too am, “Best dü un Liara en Iesra’eel, un weetst dize Dinja nich?”
11 “Gauns entshieden zaij ekj too jünt, wie räden waut wie weeten un seijen waut wie jezeenn han, un jie nämen ons Seichnis nich aun.”
12 Wan ekj jünt irrdishe Dinja jezaicht ha un jie jleewen nich, woo woa jie jleewen wan ekj jünt himelshe Dinja zaij?”
13 “Kjeena es nop jefoarren nö dem Himel büta dee waut rauf kjeem fon dem Himel; daut es, de Menschenzän dee en dem Himel es.”
14 “Un zoo aus Moozes de bronzne Shlang en de Wiltnis ophoof, kraikt zoo mot de Menschenzän opjehöwen woarren,“
15 “daut wäa‘ema aun am jleewt nich zul fekömen öba det eewjet Läwen han.“
16 “Dan Got leewd de Welt zoo, daut hee zienem eensjefödaden Zan jeef, daut wäa’ema aun am jleewt, nich zul fenicht woarren öba det eewjet Läawen han.
17 “Dan Got shekjt zienem Zän nich en de Welt nen, de Welt too fedaumen, öba daut de Welt derrch am mucht jeradt woarren.“
18 “Dee waut aun am jleewt es nich fedaumt; öba dee waut nich jleewt es nü ol fedaumt doawäajens daut hee nich haft jejleewt aun dem Nömen fon Got zienem eensjefödaden Zän.”
19 “Un dit es de Fedaumnis, daut Licht es en de Welt nen jekömen, un Menschen leewden Diestanis leewa aus Licht, doawäajens daut äare Döten beez wiarren.“
20 “Dan jieda eena waut shlaichtet eewt haust det Licht un kjemt nich nö det Licht, daut ziene Döten nich jeöpenboat woarren.“
21 “Öba dee waut de Woarheit deit kjemt nö det Licht, daut ziene Döten muchten kloa too zeenn gönn daut dee en Got Jedönn zenn.“
22 Nö dize Dinja kjeemen Jeezus un ziene Jinja en det Launt fon Judäja nen, un zee bleewen doa un deepten.
- Nü Jehanes deept uk en Änon dicht aun Salim, wiels doa wia fäl Wöta. Un zee Kjeemen un wiarren jedeept,
24 dan Jehanes wia noch nich en det Jefenkjnis jeshmäten.
25 Dan kjeem doa un jestried op fon wese fon Jehanes ziene Jinja un de Jüden äwa de Reinjunk.
26 Un zee Kjeemen nö Jehanes un zäden too am, “Rabie, dee waut met die wia aun jantzied Jorrdon, too wäm dü seijzd, zee‘emöl, hee deept un aule kömen nö am.”
27 Jehanes auntwuad un zäd, “Un Maun kaun nusht kjrian büta am woat daut jejäwt fon dem Himel.“
28 “Jie zelfst seijden daut ekj zäd, ‘Ekj zen nich de Kjrist,’ öba, ‘Ekj zen worrden jeshekjt ferr am.‘
29 ‘Dee waut de Brüt haft es de Briegaum; öba de Frint fon dem Briegaum, waut doa steit un am hiat, dee freit zikj zeeja wäajens dem Briegaum ziene Stem. Doawäajens, dit, miene Freid es errfelt.”
30 “Hee mot toonämen, öba ekj mot aufnämen.”
31 “Dee wäa fon böwen kjemt es böwa aulem; dee wäa fon de Iad es, es Irrdish un rädt fon de Iad. Dee wäa fon böwen kjemt es äwa aulem.”
32 “Un waut hee haft jezeenn un jejhiat, daut seicht hee; un kjeena nempt zien Seichnis aun.”
33 “Dee wäa zien Siechnis aunnemt, haft beshlöten daut Got woa es.
34 “Dan dee wäm Got Jeshekjt haft, rädt Got ziene Wiad, dan Got jeft am nicht dem Jeist met Möt.”
35 “De Föda leewt dem Zän, un haft aules en ziene Henj jejäft.
36 “Dee wäa aun dem Zän jleewt haft det eewjet Läwen; un dee waut dem Zän nich jleewt woat det Läwen uk nich zeenn, öba Got ziene Wut blift op däm.”