4:1  Meistash, jäwt jüne Sklöwen waut raicht un äwareen es, wiels jie weeten daut jie uk un Meista han en dem Himel.

2   Hoolt iarrentslich aun en Jebäd, un wäakt doa’en met Dank jäwen;

3  wiels jie uk fe ons bäden, daut Got wuad ne Däa öp mäaken too ons fe det Wuat, toom det Jeheemnis fon Kjristus räden, fe waut ekj uk en Kjäden zen,

4  daut ekj daut mucht öpenboa mäaken, zoo aus ekj räden zul.

5  Waundelt en Weisheit jäajen dee waut büten zenn, un kjeept de Tiet trigj.

6  Löt jüne Räd ema met Jnöd zenn, jereedt met Zolt, daut jie muchten weeten woo jie eena dem aundrem auntwuaten zulen.

7  Tikiekus, un jeleewda Brooda, trüja Deena, un Metdeena en dem Harrn, woat jünt aul det Nies fon mie fetalen.

8  Ekj shekj am nö jünt fe kraikt dize Uazäak, daut hee[1] mucht jüne Toostaunten weeten un jüne Hoaten treesten,

9  met Onesimus, un trüja un jeleewda Brooda, dee eent fon jünt es. Zee woarren jünt aul de Dinja weeten löten waut hia pesiarren.

10  Aristarrkus mien Metjefangna jreest jünt, met Marrkus, de Fada too Barrnabus (äwa wäm jie Befälungen jekjräajen han: wan hee nö jünt kjemt, mäakt am Welkom),

11  un Jeezus dee doa Justus jenant es. Dit zenn miene Metoabeida fe det Gotesrikj dee fon de Beshniedunk zenn; dee zenn opjewäzen aus un Troost too mie.

12  Eipafrus, dee eent fon jünt es, un Sklöw fon Kjristus, jreest jünt, un oabeidt ema drinjent fe jünt en Jebäda, daut jie muchten ütjefoadicht un foadich[2] stönn en aul Got zienem Welen.

13  Dan ekj dräujg Seichnis too am daut hee un grooten Iewa haft fe jünt, un dee waut en La’odisiejan  zenn, un dee en Hai’errapolis.

14  Lukas de jeleewda Dokta un Diemas jreesen jünt.

15  Jreest de Breeda waut doa en La’odisiejan zenn, un Nimfas un de Kjoakj waut en zien[3] Hüs es.

16  Nü wan dis Breef mank jünt jeläst woat, zeet daut dee uk jeläst woat en de Kjoakj fon de La’odisiejan, un daut jie uk dem Breef fon La’odisiejan läzen.

17  Un zaicht too Arrkipus, “Paus op nö dem Deenst waut dü kjrächst fon dem Harrn, daut dü daut muchst  errfelen.”

18  Dize Grus bie miene äjene Haunt, Paulus. Hoolt miene Kjäden aumdenkj. Jnöd zie met jünt. Amen. (Jeshräwen fon Room too de Kolosa derrch Tikiekus un Onesimus.)

[1] NU-Taikst last jie muchten onze Toostaunten weeten.  

[2] NU-Taikst last fefol jetreest.

[3] {NU-Taikst last Nympha un de Kjoakj waut en äa Hüs es. }