3:1  Nü en det feftiande Joa fon Taibieriejus Siezarr ziene Harrshoft, aus Pontiejus Pielatus Gowerrnia wia äwa Jüdäja, Herödus wia Gowerrnia äwa Galiläja, un zien Brooda Filipus wia Gowerrnieja äwa de Jäajent fon Trakonaitis, un Lizaniejus wia Gowerrnia äwa Abilienie,

2 wielt Annas un Kaijafus Hüajgapriesta wiarren, kjeem Got zien Wuat nö Jehanes, de Zän fon Zakariejus en de Wiltnis.

3 Un hee jinkj en de gaunse Jäajent rom dem Jorrdan un prädicht de Doop fon Büsee fe de Zindenfejäwunk,

4 zoo aus daut jeshräwen steit en de Wiad fon dem Profeet Jezaija waut zäden,

„De Stem fon eenen waut en de Wiltnis                                                       shräch,

           ‚Mäakt dem Waich fon dem HARRN reed;

           Mäakt ziene Stiej jlikj.

5         Jieda Töl zaul jefelt woarren

           Un jieda Boach zaul läach jebrocht

                   woarren;

           De krome Städa zelen jlikj jemäakt

                  woarren,

           Un de rofu Wäaj glaut;

6         Un aul det Fleesh zaul de Radunk fon Got

                  zeenn.’”

7  Dan zäd hee too de Shoarren waut doa rüt kjeemen toom jedeept woarren bie am, “Shlangenbroodzel! Wäa haft jünt jewoarrnt fon daut Oajanis too fläjen waut doa too kömen es?

8 “Doawäajens dräacht Fruchten waut Büsee achtungswiat zenn, un fankt nich aun too zaijen too jünt zelfst, ‚Wie han Abraham aus onzem Föda.‘ Dan ekj zaij too jünt daut Got kaun Kjinja fäa brinjen too Abraham fon dize Steena.

9 “Un zoogoa nü es de Aikjs öl aun de Warrtel fon de Beem jelaicht. Doawäajens jieda Boom waut nich goode Frucht draicht woat döl jeshnäden un en det Fia jeshmäten.“

10 Dan früajgen de Menschen am un zäden, „Waut zel wie dan doonn?“

11 Hee autwuad un zäd too ent, “Dee waut twee Wanikjs haft, löt am nö däm jäwen waut doa kjeent haft; un dee waut Äten haft, löt am kraikt zoo doonn.

12 Dan kjeemen de Takskolaikta uk toom jedeept woarren, un zäden too am, „Liara, waut zel wie doonn?“

13 Un hee zäd too ent, “Kolaikt nusht meeja aus bestalt es fe jünt.

14 Kraikt zoo früajgen de Zuldötun am un zäden, „Un waut zel wie doonn?“ Dan zäd hee too ent, “Shekjat kjeenen en, un doot uk nich faulsh fekläujgen, un ziet toofräd met jünem Loon.“

15 Nü aus de Menschen toofezchtlich wiarren, un dochten aule Dinja derrch en äare Hoaten äwa Jehanes, aus hee mucht de Kjrist zenn ooda nich,

16 Jehanes auntwuad un zäd too aulem, “Ekj deep jünt entshieden en Wöta; öba eena mechtja aus ekj kjemt, wäm ziene Shoo Reemus ekj nich wiat zen öp too leezen. Hee woat jünt met dem Heiljen Jeist un Fia deepen.

17 „Ziene Worrflunks Shefel es en ziene Haunt, un hee woat ziene Drashflua aufputsen, un det Weit en zienem Staul zaumeln; öba det Sprie met onütgönndet Fia febrenn.“

18 Un met fäle aundre Femönungen prädicht hee too de Menschen.

19 Öba Herödes de Gowerrnia, aus hee femönt worrt wäajens Herödiejus, zien Brooda Filipus ziene Frü,[1] un fe aul daut shlaichtet waut Herödus Jedönn haud,

20 läd noch dit doatoo, äwa aules, daut hee am en det Jefenknis beshloot.

21 Un aus aule Menschen jedeept wiarren, neem zikj daut zoo rom daut Jeezus uk jedeept wia; un wiels hee bäd, worrt de Himel öpjedönn.

22 Un de Heilja Jeist kjeem rauf en un Kjarrpalichen jeshekj zoo aus ne Düw op am, un ne Stem kjeem fon dem Himel waut zäd, „Dü best mien jeleewda Zän; en die zen ekj sheen toofräd.”

23 Nü Jeezus zelfst fonk zienem Deenst aun aus hee rom darrtich Joa oolt wia, zoo aus jedocht wia, wia hee de Zän fon Jösef, de Zän fon Hielai,

24  de Zän fon Matat, de Zän fon Lewie, de Zän fon Melkie, de Zän fon Jana, de Zän fon Jösef,

25 de Zän fon Matataija, de Zän fon Amos, de Zän fon Nahum, de Zän fon Eslie, de Zän fon Nagai,

26 de Zän fon Ma’at, de Zän fon Matataija, de Zän fon Semie, de Zän fon Jösef, de Zän fon Jüda,

27 de Zän fon Jö’anas, de Zän fon Riesa, de Zän fon Zerubabel, de Zän fon Shie’altiel, de Zän fon Nerrie,

28 de Zän fon Melkie, de Zän fon Adie, de Zän fon Kösam, de Zän fon Elmödam, de Zän fon Err,

29 de Zän fon Hosä, de Zän fon Eliezer, de Zän fon Jorim, de Zän fon Matat, de Zän fon Levie,

30 de Zän fon Simiejon, de Zän fon Jüda, de Zän fon Jösef, de Zän fon Jönan, de Zän fon Eliejakim,

31 de Zän fon Melieja, de Zän fon Menan, de Zän fon Matata, de Zän fon Natan, de Zän fon Dawied,

32 de Zän fon Jesie, de Zän fon Öbed, de Zän fon Bö’az, de Zän fon Salmon, de Zän fon Nashon,

33 de Zän fon Aminadab, de Zän fon Ram, de Zän fon Hetsron, de Zän fon Peres, de Zän fon Jüda,

34 de Zän fon Jakob, de Zän fon Iezak, de Zän fon Abraham, de Zän fon Tera, de Zän fon Nahorr,

35 de Zän fon Serug, de Zän fon Re’ü, de Zän fon Peleg, de Zän fon Eberr, de Zän fon Shiela,

36 de Zän fon Kainan, de Zän fon Arrfaksad, de Zän fon Shem, de Zän fon Nö’ah, de Zän fon  Lämek,

37 de Zän fon Metüzala, de Zän fon Einok, de Zän fon Jared, de Zän fon Mahalalel, de Zän fon Kainan,

38 de Zän fon Enosh, de Zän fon Set, de Zän fon Adam, de Zän fon Got.

[1] NU-Taikst last zienem Brooda ziene Frü.