18:1  Nö dize Dinja zach ekj noch een Enjel rauf kömen fon dem Himel, un haud groote Machtraicht, un de Iad wia opjedacht met ziene Harrlichkjeit.

2  Un hee shräch zeeja met ne lüde Stem un zäd, “Babiloon de Groote es jefolen, es jefolen, un es ne Wönstäd jeworrden fe Diewels, un un Jefenkjnis fe jieda onreina Jeist, un un Klötje fe jieda onreinet un jehastet Fäujgel!

3  “Dan aule Natsjoonen han jedrunken fon dem Wien fon de Wut fon äare Hüararie, de kjenichs fon de Iad han Hüararie jedräwen met arr, un de Haundeldriewa fon de Iad zenn rikj jeworrden derrch äare äwaflisende Rikjlichkjeit.

4  Un ekj hiad ne Stem fon dem Himel zaijen, “Komt üt arr rüt, miene Menschen, doamet jie nich en äare  Zinden deel nämen, un doamet jie nich äare Pläujgen kjrian.

5  “Dan äare Zinden han bot dem Himel jeräkjt,[1] un Got haft äare Zinden aun dem Denkj jehoolen.

6  “Tölt trigj too arr zoo aus zee too jünt jetölt haft, un tölt arr dobelt trigj nö äare Woakjen nö; en det Kufel waut zee femisht haft, femisht dobelt fe arr.

7  “En de Möt waut zee zikj haft feharrlictht un rikjlich jeläwt haft, en de zelwje Möt jef arr Tüaleidunk un Triebzaul; dan zee zaicht en äa Hoat, ‚Ekj zet aus Kjenijin, un zen nich ne Wätfrü, un woa kjeen Triebzaul zeenn.‘

8  “Doawäajens woarren äare Pläujgen en een Dach kömen, Doot, Trüash un Hungashnoot. Un zee woat gauns febrent woarren met Fia, dan stoakj es de Harr Got dee arr recht.

9  “De Kjenichs fon de Iad waut Hüararie eewen met arr un läwen rikjlich met arr woarren hielen un jaumariarren fe arr, wan zee dem Rüak fon äa jebren zeenn,

10  “un woarren un Enj auf stönn fe Forrcht fon  äa tüaleiden, un zaijen, „Wee, wee, dee groote Staut Babiloon, dee mechtje Staut! Dan en eene Stund es äa Jerecht jekömen.‘

11  “Un de Haundeldriewa fon de Iad woarren hielen un trüarrn äwa arr, dan kjeena kjaft äare Woa meeja:

12  “Woa fon Golt un Zelwa, Kjestliche Steena un Parrlen, feinet Seich un Bleiwroot, Sied un Shoarlokroot, jieda zorrt fon Sitrushoolt,[2] jieda zorrt fon Zachen fon Aulfenbeem, jieda zorrt Zachen fon kjestlichet Holt, Mezinkj, Ieza, un Marmelsteen;

13  “un Zeetholt[3] un Zeeterüak,[4] sheenrikjendet Eelj un, Wien un Eelj, un fienet Mäl un Weit, Fee un Shöp, Piad un Wäujges, un Kjarrpash un Zeelen fon Menschen.

14  “De Frucht waut diene Zeel jankad es fon die jegönn,[5] un aul de Dinja waut Glauns un Prachtfol zenn, zenn waich jegönn fon die, un dü woasht dee äwaheipt nich meeja finjen.

15  “De Haundelsdriewa fon dize Dinja, waut rikj worrden derrch arr, woarren un Enj auf stönn fe Forrcht fon äa jekjwäl, un woarren hielen un shlemen,

16 “un zaijen, ‘Wee, wee, dee groote Staut waut jekjleedt wia en feinet Seich, Bleiwroot, un  Shoarlokroot, un ütjestraumt met Golt un kjestliche Steena un Parrlen!

17  ‘Dan en eene Stund zenn zoone groote Rikjdoms too nusht jekömen.’ Jieda Shepmeista, aul dee waut bie Shep reizen, aule Shäpslied, un zoo fäl aus Tushhaundeln op de Zee, stunden un Enj auf

18  “un shräjen üt aus zee det Rüak fon äa Jebren zajgen, un zäden, ‘Waut es zoo aus dize groote  Staut?‘

19  “Zee shmeeten stoff op äare Kjap un shräjen üt, hielden un jaumariaden, un zäden, ‘Wee, wee, dee groote Staut, en woone aul dee waut Shäp op de Zee hauden un worrden rikj derrch äare Rikjdoms! Dan en eene Stund es zee fewiest jemäakt.’

20  “Freit jünt äwa arr, Ö Himels, un jie heilje Aposteln un Profeeten, dan Got haft jünt op arr jeraicht!”

21  Dan noom un mechtja Enjel un Steen zoo aus un groota Mälsteen un shmeet däm en de Zee, un zäd, “Zoo met Jewault woat dee groote Staut Babiloon döl jeshmäten woarren, un woat nich meeja jefungen woarren.

22  De jelüd fon Hoap Späla, Müzikaunten, Fleeten Späla, Trompeeten Späla woarren nich meeja en die jehiat woarren. Kjeen Büja fon irrjent ne zorrt woat meeja en die jefungen woarren, un det Jelüd fon un Mälsteen woat nich meeja en die jehiat woarren.

23  “Det Licht fon ne Laump woat nich meeja en die shienn, un de Stem fon dem Briegaum un de Brüt  woat nich meeja en die jehiat woarren. Dan diene Haundeldriewa wiarren de groote Mana fon de Iad, dan derrch diene Zaubarie wiarren aul de Natsjoonen feleidt.

24  “Un en arr wia jefungen det Bloot fon de Profeeten un de Heilje, un fon aul dee waut aufjeshauft wiarren op Iaden.“

[1] {NU-un M Taikst läzen zenn op jehüpt worrden.

[2] Friezen

[3] Kerneel, Friezen

[4] Kjriedarie, Friezen

[5] NU-un M-Taikst läzen es feloarren too jünt.