9:1  Dan blözd de fefda Enjel: Un ekj zach un Stiarrn faulen fon dem Himel nö de Iad. Too däm wia de Shlätel too de Gruft önen Bodem jejäwt.

2  Un hee müak de Gruft önen Bodem öp, un Rüak kjeem nop üt de Gruft rüt zoo aus Rüak fon un grooten Hetöwen. Un de Zon un de Loft worrden diesta wäajen det Rüak fon de Gruft.

3  Dan, üt det Rüak kjeemen Graushopash op de Iad. Un too dee wia Krauft jejäwt, zoo aus Skoarrpiejoonen fon de Iad Krauft han.

4  Dee wiarren befölen nich det Graus fon de Iad too shöden, ooda irrjent un jreenet Dinkj, ooda irrjent un Boom, öba bloos dee Mana waut nich dem Zäajel fon Got aun äa Stiarrn hauden.

5  Un dee wiarren nich Machtraicht jejäwt dee Doot too mäaken, öba toom ent tüaleiden fe fief Moonaten. Äa Tüaleiden wia aus fon un Sköarrpiejoon wan dee un Mensch staikjt.

6  En dee Däujgel woarren Menschen dem Doot zäkjen un woarren däm nich finjen; zee woarren felangen toom stoawen, un de Doot woat fon ent fläjen.

7  Det jeshekj fon de Graushopash wia aus Piad reed jemäakt fe Kjrich. Op äare Stiarrns wiarren Kjroonen fon waut un bät zoo aus Golt wiarren, un äare Jezechta wiarren zoo aus Menschen Jezechta.

8  Dee hauden Hoa zoo aus Früjes Hoa, un äare Tän wiarren zoo aus Leiws Tän.

9  Un dee hauden Brostshilda fon Ieza, un de Jelüd fon äare Flichten wia aus de Jelüd fon fäle Wäujges met fäle Piad waut en un kjrichs Kaumf rann.

10  Dee hauden Säajel zoo aus Skoarrpiejoonen, un doa wiarren Brena en äare Säajel. Äare Krauft wia Menschen shöden aun too doonn fe fief Moonat.

11  Un dee hauden aus un Kjenich äwa ent dem Enjel fon de Gruft önen Bodem, wäms Nömen en Heebräja Abadon es, öba en dem Jriechashen dem Nömen Apoljon.

12  Een Wee es febie. Zeetemöl, noch twee meeja Weejen zenn too kömen nö dize Dinja.

13  Dan blözd de zasta Enjel: Un ekj hiad ne Stem fon de Feeja Hiana fon dem goldnen Aultoa waut ferr Got es,

14  un zäd too dem zasten Enjel waut dem Trompeet haud, „Löt de feeja Enjeln loos waut bie dem grooten  Riefa Jüfräties jebungen zenn.“

15  Un de feeja Enjeln, waut doa wiarren reed jemäakt fe de Stund un dem Dach un de Moonat un det Joa, wiarren loos jelöten toom un dredel fon Menschheit Doot mäaken.

16  Nü de Numa fon de Armee fon de Piatsmana wia twee hundat miliejoon; ekj hiad dem Numa fon dee.

17  Un zoo zach ekj de Piad en dem Fäashien: dee waut doa böwen zauten hauden fiaroode Brostshilda, shwoatroode, un Shwäwelblit jäle; un de Kjap fon de Piad wiarren zoo aus de Kjap fon Leiws; un üt äare Miela kjeem Fia, Rüak, un Shwäwelblit.

18  Bie dize dree Pläujgen worrt un dredel fon Menschheit Doot jemäakt, bie det Fia un det Rüak un det Shwäwelblit waut üt äare Miela kjeem.

19  Dan de Krauft[1] es en äare Miela un en äare Säajel; dan de Säajel zenn zoo aus Shlangen, un han Kjap; un met dee doonn zee shöden.

20  Öba de äwaje fon Menschheit, waut doa wiarren Doot jemäakt fon dize Pläujgen, deeden nich Büsee fon de Woakjen fon äare Henj, daut zee nich zulen Diewels aunbäden, un Aufjeta fon Golt, Mezinkj, Steen, un Holt, waut nich zeenn kjenn uk nich hiarren un nich gönn.

21  Un dee deeden nich Büsee fon äare Merrdash ooda äare Zaubariejen ooda äare Hürariejen ooda äare Stälariejen.

[1] NU un M- Taiksten läzen de Krauft on de Piad.