10:1  Breeda, mien Hoates Felangunk un Jebäd too dem Got fon [1]Iesra’eel es daut zee muchten jeradt woarren.

2  Dan ekj dräujg ent Seichnis daut zee Iewa fe Got han, öba nich nö Wisenshoft nö.

3  Dan zee, wiels zee onwisent zenn fon Got ziene Jeraichtichkjeit, un fezäkjen äare äjene Jeraichtichkjeit optoostalen, han zikj nich unjadönn too Got ziene Jeraichtichkjeit.

4  Dan Kjristus es det [2]Enj fon det Jezats too jieda’eenem waut doa jleewt.

5  Dan Moozes shrift fon de Jeraichtichkjeit waut fon det Jezats es, “De Mensch waut dize Dinja deit zaul derrch dee läwen.“ ^{3 Mo 18:5}

6  Öba de Jeraichtichkjeit fon dem Gloowen rädt op disem Waich, “Zaij nich en dien Hoat, ‘Wäa woat nop en dem Himel nen foarren?” ^{5 Mo 30:12}  (daut es, toom Kjristus rauf brinjen fon böwen)

7  ooda, “Wäa woat rauf en de Deep nen foarren?“ ^{D5 Mo 30:13} (daut es, toom Kjristus nop brinjen fon de Doodes).

8  Öba waut zaicht daut? “Det Wuat es die nö’aun, en dien Mül un en dien Hoat” ^{De 30:14} (Daut es det Wuat fon dem Gloowen waut wie Prädjen):

9  daut wan dü dem Harrn Jeezus bekjanst met dien Mül un jleewst en dien Hoat daut Got am haft opjerecht fon de Doodes, woasht dü jeradt woarren.

10  Dan met det Hoat jleewt eena too de Jeraichtichkjeit, un met det Mül woat Bekjantnis jemäakt too de Radunk.

11  Dan de Shreft zaicht, “Wäa’ema aun am jleewt woat nich too shaund jemäakt woarren.“ ^{Isa 28:16}

12    Dan doa es kjeen unjasheet tweshen Jüd un Jriech, dan de nämelja Harr es rikj äwa aul dee waut aun am roopen.

13  Dan “wäa’ema aun dem HARRN roopt woat jeradt woarren.” ^{Jo 2:32}

14 Woo zelen zee dan aun däm roopen aun wäm zee nich jejleewt han?  Un woo zelen zee jleewen aun däm fon wäm zee nich jehiat han? Un woo zelen zee hiarren önen un Prädja?

15  Un woo zelen zee prädjen büta ent woat jeshekjt? Zoo aus daut jeshräwen es:

„Woo shmok  zen de Feet [3]fon dee waut det

                Eefanjeeliejum fon Fräd prädjen,

          dee waut goode Nörecht brinjen!“ ^{Jez 52:7; Na 1:15}

16  Öba zee zen nich aula det Eefanjeeliejum jehoorzom. Dan Jezaija zaicht, „Harr, wäa haft onze Berecht jejleewt?“ ^{Isa 53:1}

17  Zoo dan, Gloowen kjemt derrch hiarren, un hiarren derrch Got zien Wuat.

18  Öba ekj zaij, han zee nich jehiat? Jö, zecha:

„Dan det Jelüd es rüt jegönn en aul de Welt nen,

          Un äare Wiad too de Enja fon de Welt.“ ^{Ps 19:4}

19  Öba ekj zaij, wist Iesra’eel nich? Iasht, Moozes zaicht: „Ekj woa jünt aunreitsen too Aufgonst  derrch dee waut nich un Natsjoon zenn, ekj woa jünt enoajerrn met un noarashet Natsjoon. ^{5 Mo 32:21}

20  Öba Jezaija es zeeja driest un zaicht:

“Ekj wia jefungen derrch dee waut mie

                nich zochten;   

          Ekj wia je’öpenboat too dee waut nich nö mie

                früajgen.” ^{Isa 65:1}

21  Öba too Iesra’eel zaicht hee:

“Dem gaunsen Dach äwa straikjt ekj miene

Henj üt

Nö un onjehoorrzomet un jäajenaundet

Folk.”  ^{Jez 65:2}

[1] NU-Taikst last ent.

[2] De Meeninj hia es det Siel.

[3] NU-Taikst lat üt fon dee waut det Eefanjeeliejum.