9:1  Ekj zaij de Woarheit en Kjristus, un ekj läj nich, mien Jewesen draicht mie uk Seichnis en dem Heiljen Jeist,

2  daut ekj ha groote Trüa un aunhoolende Zorrj en mien Hoat.

3  Dan ekj kun wenschen daut ekj zelfst kun feflucht zen fon Kjristus fe miene Breeda, miene Metmenschen nö det Fleesh nö,

4  dee doa Iesra’eelieten zen, too wäm de Adoptiarunk jeihiat, de Harrlichkjeit, de Febinjungen, det jäwen fon det Jezats, dem Deenst fe Got, un de Fespräakjungen,

5  fon wäm de Födash zen un fon wäm, nö det Fleesh nö, Kjristus kjeem, dee doa äwa aules es, de eewichlich jezäajenda Got. Amen.

6   Öba daut es nich daut Got zien Wuat nich feshlachzom es jewast. Dan dee zen nich aula Iesra’eel waut fon Iesra’eel zen,

7  un dee zenn nich aula Kjinja wiels zee fon det Zöt fon Abraham zen; öba, “En Iezak zaul dien Zöt jeroopt woarren.” ^{Ge 21:12}

8  Daut es, dee zenn nich Kjinja waut doa Kjinja fon det Fleesh zen, dize zenn nich de Kjinja fon Got; öba de Kjinja fon de Fespräakjunk zenn jetalt aus det Zöt.

9  Dan dit es det Wuat fon de Fespräakjunk: “Too dize Tiet woa ekj kömen un Zara woat un Zän han.” ^{1 Mo 18:10,14}

10  Un nich bloos dit, öba aus Rebeka iasht shwanga wia derrch een Maun, zoogoa derrch onzem Föda Iezak,

11  (dan de kjinja, noch nich jebooren, un hauden noch nich goodet ooda shlaichtet jedönn, zoo daut Got zienem Swak mucht nö ziene Wälunk nö stönn, nich fon Woakjen öba fon däm dee doa roopt, )

12  wia daut jezaicht too arr, “De elra zaul dem jinjren deenn.” ^{1 Mo 25:23}

13  Zoo aus daut jeshräwen es, “Jakob ha ekj jeleewt, öba Eizau  ha ekj jehaust.” ^{Mal 1:2,3}

14  Waut zel wie dan zaijen? Es doa Onjeraichtichkjeit met Got? Zecha nich!

15  Dan hee zaicht too Moozes, “Ekj woa mie errboarrmen aun wäm ekj mie woa errboarrmen, un  ekj woa Metleet han aun wämema ekj woa Metleet han.” ^{Ex 33:19}

16  Zoo dan es daut nich fon däm waut doa wel, uk nich däm waut doa rant, öba fon Got waut Errboarrmunk bewiest.

17  Dan de Shreft zaicht too Fara’ö, “Fe kraikt dize Uazäak ha ekj die opjerecht, daut ekj miene Krauft en die mucht bewiezen, un daut mienem Nömen mucht berecht woarren en de gaunse Welt.” ^{2 Mo 9:16}

18  Doawäajens haft hee Errboarrmunk aun wäm hee wel, un wäm hee wel mäakt hee hoat.

19  Dü woasht dan zaijen too mie, “Wuarom finkt hee noch fäla? Dan wäa haft zienem Welen wadajestönn?“

20  Öba doch entshieden, Ö Mensch, wäa best dü Auntwuat too jäwen jäajen Got? Woat det Dinkj waut jeforrmt es zaijen too däm waut daut müak, “Wuarom müaks dü mie zoo aus dit?”

21  Haft de Toopstrikja nich macht äwa det Leem, fon dem zelwjen Klüten een Jefäs too mäaken too Ia un, un aundret too onia?

22  Waut wan Got, wiels hee wul zien Oaja un ziene macht löten weeten, fedrüach met langet Jedult de Jefäsa reed jemäakt fe Fedoawnis,

23  un daut hee mucht de Rikjdoms fon ziene Harrlichkjeit löten weeten op de Jefäsa fon ziene Errboarrmunk, waut hee en dem Ferüt haud reed jemäakt fe Harrlichkjeit,

24  zoogoa ons, wäm hee roopt, nich bloos fon de Jüden, öba uk fon de Heiden?

25   Zoo aus hee uk zäd en Hözäja:

 

“Ekj woa dee miene Menschen nann waut nich

                miene Menschen wiarren, un arr de

                jeleewde, waut nich jeleewt wia.” ^{Hö 2:23}

26     “Un daut woat zoo rom kömen en de Städ wua

                daut jezaicht wia too ent,

          ‘Jie zen nich miene Menschen,’

          Doa woarren zee de Zäns fon dem läwenjen Got

                 jenant woarren.” ^{Hö 1:10}

 

27  Jezaija roopt uk üt wäajen Iesra’eel:

 

“Wan de Numa fon de Kjinja fon Iesra’eel zul

                zoo zen aus det Zaunt fon de Zee,

          De Äwajebläwne woarren jeradt

                woarren. ^{Isa 10:22,23}

 

28     [1]Dan hee woat det Woakj foadjen un korrt

                shnieden en Jeraichtichkjeit,

          Wiels de HARR woat ne korrte Oabeit mäaken

                op de Iad.”

 

29  Un zoo aus Jezaija eeja jezaicht haud:

 

“Wan de HARR fon Zaba’öt ons nich un Zöt

                Jelöten haud,

          Wie wuaden zoo zen jewast aus Zodom,

          Un wie wuaden zen zoo jemäakt aus

                Gömora.“ ^{Isa 1:9}

 

30    Waut zul wie dan zaijen? Daut de Heiden, dee doa nich de Jeraichtichkjeit nö fuarren, han de Jeraichtichkjeit errlangt, zoogoa de Jeraichtichkjeit fon Gloowen;

31  öba Iesra’eel, waut det Jezats fon Jeraichtichkjeit nö fua, haft de [2]Jeraichtichkjeit fon det Jezats nich errlangt.

32  Wuarom? Weils zee zochten daut nich derrch Gloowen, öba zoo aus daut wia, [3]derrch de Woakjen fon det Jezats. Dan zee stolpaden äwa dem Stolpasteen.

33  Zoo aus daut jeshräwen es:

 

“Zeetemöl, ekj laij en Siejön un Stolpasteen un

un Steen fon Steeten,

Un wäa’ema aun am jleewt woat nich too

shaund jedönn woarren.” ^{Isa 8:14 28:16}

[1] NU-Taikst last Dan de HARR woat de Oabeit foadjen un korrt shnieden op Iaden.

[2] NU-Taikst lat Jeraichtichkjeit üt.

[3] NU – Taikst last derrch Woakjen.